Taküm BJP dangi Rs. 437 Crore tenla aru

New Delhi, December 7 (Agencies) : 2014-2015 financial year nung BJP dangi tenla arubaji Congress dangi aruba nungi asemben agi timba liasü, ta Association for Democratic Reforms and the National Election Watch-i metetdaktsü.
2014-2015 financial year nung BJP dangi Rs. 437.35 crore tenla aru aser Congress dangi Rs. 141.46 crore aru.
BJP nem sen meyirjang 20 ser tema tenla agütsür kija aser telok balala 1,234 liasü aser parnoki tenla agütsüba senji Congress aser Nationalist Congress Party, CPI o CPM dangi aruba sen ajak meyoktepera timba lir, ta ADRNEW-isa metetdaktsü.
BJP nem tenla agütsürtem rongnung shilem 39 ji shishilembaba teloktem nungi liasü aser sen timba agütsüba state ji Maharashtra liasü.
Yaküm BJP dangi Rs. 170.86 crore tenla aru saka takümbo parnok dangi Rs. 437.35 crore (156% agi timba) aru.
BSP-ibo parnok dangi Rs. 20,000 ser tema tenla kecha maru ta metetdaktsüogo aser parnoki tesüiba küm 10 tashi yamaji dang kuli agüja arur.
Shishilembaba teloktem rongnung tenla timba agütsürji Bharti Group’er Satya Electoral Trust lir aser parnok sülen General Electoral Trust lir, ta ADRNEW sangdong nungsa shia lir.
Satya Electoral Trust-i yimten telok asem nem Rs. 132 crore tenla agütsü aser ibaji BJP nem Rs. 107.25 crore, Congress nem Rs. 18.75 crore aser NCP nem Rs. 6 crore agütsüba liasü.
General Electoral Trust-i 2013-14 financial year nungbo National Party shinga nema tenla magütsü saka tan finacial year nungbo parnoki BJP aser Congress nem Rs. 117.30 crore tenlaogo. Parnoki BJP nem Rs. 63.2 crore aser Congress nem Rs. 54.10 crore agütsü.