Taküm J& K LoC nung telungpur 38 tepsetogo: Army

Jammu, June 08 (Agencies): Taküm Jammu & Kashmir kübok Line of Control (LoC) nung telungpur 38 tepsetogo aser arrtsü alema aittsü merangba 22 ben nokdangtetogo, ta tanü Indian Army osang ka ajanga metetdaktsü.
Kasa osang ajanga ashiba agi, tesüiba ghonda 48 tsüngda nunga Gurez, Machhil, Naugam aser Uri sectors nung arrtsü alema aittsü merangba nokdangtetogo, aser iba mapang nung prangpong bena alir parnok tenet tepsetogo.
Tanü army ketdangser kati, “Taküm arrtsü alema aittsü merangba 22 ben nokdangtetogo aser LoC nung prangpong bena alir 38 tepsetogo,” ta metetdaktsü.
“Security sepaitemi kanga meranga mita aoba ajanga Pakistan nunger arrtsü alema aittsü merangba nokdangtetogo, aser temeshi ita, Ramzan mapang nung parnok (Pakistan) agent temi Jammu & Kashmir nung kiralongra proktsü meranger,” ta paisa ashi.
Ano Parliament nunga Minister of State for Defence, Subhash Bhamre-ia, 2015 aser 2016 küm arrtsülen nungi Kashmir telungi aittsü 116 merangogo, ta metetdaktsü.
2016 küm nungi tenzüka tang tashi nung Kashmir nung telungpur anema operation aodang army-a 59 süogo.