Taküm Kaziranga nung kentok 3 kahsetogo

Guwahati, January 27 (Agencies): Tesüiba ghonda 48 tsüngda Assam nung aliba Kaziranga National Park nung kentok ana kahsetogo, aser ibaji densemabo taküm küm tenzüker iba Park nung kentok asem tashi kahsetogo.
“12:30 ako meta Burhapahar range nung prangpong ola angashi, idangyongjisa mita ao. Ajisüaka Bodhbarnü forest guard temi kenok tasümang angu. Kentok tezübo maliasü,” ta Park ketdangser kati ashi.
Ketdangserntemi ashiba agi, iba tesem nung aliba injang terep ajanga, state nung telungpurtemi ozüng alema shikarir ta temaitsü sayur.
Alima nung tezü ka aketba kentok anünga aliba tongti tesemji Kaziranga lir. Yaküm Assam nung aliba 185 sq. mile nung kentok 17 tashi kahsetogo.
1990s tetenzüklen tezü ka aketba kentok ya joko alima nungi tesamar dang liasü aser International Union for Conservation of Nature-ia iba kentok tapu ya tesamar dang ta shiogo.
Kaziranga ketdangsertemi ozüng alema shikarirtem anema maneni rara arur. Kentok tezü ya China nungbo sen aika yong yokteter.
2013 census ajanga, alima nung kentok tezü ka keta aliba tapu ya 3,300 dang lir aser item rongnung jagi Kaziranga nung 2,329 lir.