Taküm küm tashi nung India-i linük ajak den tongteptsü: Sushma

New Delhi, June 19 (Agencies): Tanü New Delhi nung External Affairs Minister, Sushma Swaraj-i, 2016 küm tembang tashi nung India-i tongtepratep masüba linük kata malitsü, ta ashi.
Tesüiba küm ana nung Modi sorkari foreign policy atema inyaktetbatem indang sangdongba osangbenertem senden ka nung jembidang Swaraj-i, bendang linüktem semdangba mapang investment atema Centre-i inyakba ajanga FDI jenjang tajungba kümogo, ta metetdaktsü.
“2016 küm tembang tashi nung India-i alima nung aliba linük ajak den tongteper alitsü,” ta Swaraj-i ashi.
Laisa, India aser SAARC nung tanga linüktem tsüngda tesentaktep tajungba akumba atema tenüngsang agütsü.
Congress aitsüba olen ka nung Swaraj-i, Congress-i aniba taoba UPA sorkar aser tan sorkar mapang FDI medemdanga jembidang lai, “2015-16 küm Foreign Direct Investment nung US sen billion 55 sarutetba ya UPA den medemdangra shilem 43 timba akumba lir,” ta ashi.
Ato kilonser, Narendra Modi-i kanga mazüngi bendang linüktem semdanga senzüba atema aikati aitsüba dak sentakba nung Swaraj-i, “Foreign Direct Investment (FDI) ya kidang mener kazüba ajanga masü,” ta ashi.
Tawa twitter ajanga tebur kati la dang par refrigerator yanglushiba nung yaritepdaktsüner ta ashiba dak sentakba nung Sushma-i, “Nisung kar refrigerator yanglushiba nung ni meyaritettsü, saka bendanglen India nunger timtem nungbo ni meyarii malitsü,” ta ashi.
Taruba küm nungi passports tekaraba nung agütsütsü ta shia lai, “Yaküm onoki passport lakh 98 yanglu, aser takümbo 1.3 crore yangluogo. Joko Aadhar card ama maitsü tejangja agütsüra police-i meprangdang yongi passports agütsütsü,” ta ashi.
India-i NSG nung züngsem akumtsü benokba nung China-i anema meinyaker, ta laisa metetdaktsü.
“Asenoki NSG nung densemner, kechiyong telemtetba agiba nung asenokia shilem aginer. Clean energy atema-a asenoki ibaji nüngdaker,” ta Swaraj-i ashi.
India NSG züngsem akumtsü atema pusemtsü asoshi Foreign Secretary, S Jaishankar-i June 16-17 nü China yimtiba, Beijing semdangogo, ta laisa metetdaktsü.
“China-i India NSG nung züngsem akumtsü atema anema meinyaker, parnoki telatetbatem aser inyakyim indang ang jembir. Asenok NSG nung adentsü atema China-i pusemtsüsa asenoki jembitettsü ta ni imlar,” ta laisa shisem.