Taküm nung mapa shimtettsü atema peisasa pei metettsüla

Akhoya Shisaluyimer Telongjem tenzüker küm 75 ajungba tenüng nung April 26 nungi 28 tashi “Career Guidance & Spiritual Orientation” sentong nung Brehostibar nikongdang  panel discussion mapang agiba noksa ka angur. Noksa nung alirtemji (achijilen nungi-) Akum Jamir,Moderator-tem den Panelists Dr.Maongkala Longchar, Sharon Longchari, NCS, Rongsenmenla NCS, Er.Alemtushi Imsong aser Limaakum NPS liasü.

Dimapur, April 28 (TYO) : Nisung shia taküm nung mapa shimtettsü atema tamasa peisasa pei metetmatsüla, iba jagi dang taküm nung tajangzük lia jangratema inyaka aotsüsa mapa shitak shimtettettsü ta tanü yangi GCYM, Dimapur nung Akhoya Shisaluyimertem ” Career Guidance  & Spiritual Orientation” sentong nung jembidang, Wb.Vishal IPS-i metetdaktsü.
Nisung shia dak jakla tajung aser tamajung, taginüba aser tejangraba balala lir, anungji pei dak aketba tashimait aser ano tajung aketba jaklatem meteta mapa shim nung dang takok ngua inyaktettsü ta paisa ashi.
Kaketshir ka taküm nung tejangraba aika alitsüa akok, saka tejangraba ajakbo nisung kati meinyaktettsü, anungji tejangraba mapa aika nungi ishika shimtettsüla aser bilemdanga tangar nungia shisa agia shitakba nai jangraba aser nai akoktsüba mapa ka nü taküm asoshi shimtettsüla ta Vishalisa metetdaktsü.
Paisa lanurtem dang taküm piyong inyaka aotsü mapa shimtetdang Tsüngrem dang sarasadema bushitsübaji kanga tongtibang asütsü ta metetdaktsü. ” Tang ama mapa inyaktsü asoshi shisa bushiba mapang ano tanüla jenjanga dena reprangshia asentenshitsü sentong yangluba ya kanga junga apiteta inyakba mapa ka asütsü, ” ta paisa ashi.
Kasa sentong nungsa nikongdang, wadang balala nungi lenirtem jadena lanurtem den sensaksemba ( panel discussion) mapang, kaketshirtem dang taküm arishi tatsüka nung tazüngba nung mapang kangabo meindoki pei jangraba mapa inyaka nübortem yaritsü asoshi bilema inyaktsü tayongzükba agütsü.
Tanü asüngbo sorkar mapa nung dang masü saka tanga maparen aika inyaktettsüsa lenmang sadema lapoka lir, anungji lanurtemi item mapatemji reprangteta inyaktsü asoshi lenmang aika sayua liasü.
Kasa anogo nungsa, mapa inyak ashitsüba indang sentong nung, Justice for the Poor ministry nung tongti ketdangser, Rev.R.Meren Jamir-i pai ajangshiba taküm kuli ashi aser pai inyaktetba aser yanglutetba mapatem bener arua sayua liasü.
Yakanü nungi tenzükba sentong tanü Brehostibar aonung tembangogo. Iba sentong nung Tsüngrem o jembir Rev.Tiyong Kichu liasü.
Iba sentong ya Akhoya Shisaluyimertem Telongjem tenzüker küm 75 ajungba benjongmong tenüng nung ayongzükba liasü.