Taküm nungi MGNREGA kübok DBT mapa küma inyaktsü

Kohima, September 08 (TYO): Ochimashi inyakyim malitsü aser teladak süa inyaktsü atema tan financial year nungibo Nagaland sorkari MGNREGA kübok Direct Benefit Transfer (DBT) inyakyim mapa küma benshitsü, ta Hokolbarnü sorkar ketdangsertem osang ka ajanga metetdaktsü.
Rural Development Secretary, Kelei Zeliang-i, MGNREGA kübok mapa inyakertem indang job-card holders indang nija account nung National Electronic Fund Management System mesüra Public Financial Management System ajanga indangindanga sen inoktsütsü, ta metetdaktsü.
Zeliang-isa, item tajangzük angutsü atema job-card holder ajak ket nung Aadhaar den sendaktepa aliba bank account alitsüla; iba inyakyim tasenba nungbo sen teka nung mamoktsütsü, ta metetdaktsü.
Tang tashi nung MGNREGA kübok mapa inyaker 46,894-i Aadhaar den sendaktepa bank account lapoka lir aser Direct Benefit Transfer (DBT) atema temsüa lir.
MGNREGA kübok mapa inyaker ajak agi nisung lakh 1.79 indang Aadhar repranga bank account lapoktsü atema inyakdar.
Tang tashi nung state nung job cards alir nisung lakh 4.25 aser MGNREGA kübok mapa inyaker lakh 5.82 lir.