Taküm piyong ajangzüktetba konang tetushi shitettsüla

–  T. Meren Paul, Kohima

2017 küm Tebutum Anogo (Father’s Day) June 18, Nagaland Post Sunday Special nung tsürabur okola Yashitsüngba Aier taküm indang tatsüka zülua angudang kü mulung nung tepela aser mulungnen tuluka aitba shinür. Tsürabur okola Yashitsüngba Aier küna junga metetteba mali, ni pa khen anaben dang ajurua alitsü südi. Saka ni pa tenüngbo 1964-5 ni ano tanur asüdang nungi angashia aru. Kechiba süra, ni Changtongya jila nung liasü aser Mokokchung nungi tzüma mesüra bendanglen India limai aodang senzüsenpong ajak Changtongya jila ajangadangsa senzü; Süngratsü nunger par kinünger karh Changtongya nung alua High School nung azüng; onok yimer karh par mapa nung, talisa ali atuba (earth cutting) nung ayangdak inyaka liasü aser parnok ajanga Yashitsüngba tenüngji tetshiba angashi. Yashitsüngba ji contractor aser temeim akaba nisung kanga tajung ta par mapa nung inyakertemi osang sangersa aru. Onok Highschool nung azüngdang ano Yashitsüngba indang kangasa bulua jembi. Aor Govt. contractor mezüng Chuchuyimlang nunger Asür Marsosang aser Asür Arishingang sülenbo Yashitsüngba ya asütsü südi. Pa den külemi contract inyaker aser pa sülena govt. contract mapa inyaker aika adokogo saka tanü reprandangra pa ama teküpokleni masetshii jenjang temaleni tujen dang atuba aser ketsa thia nung litetba shinga mangur. Ajungben yipru mopung aruba ama Govt. supply mapa talubosa alidang asen Aor aika ajungbena nungteta adok saka, ka ana dak alaka ajak lurepogo. Onoki angashiba aser anguba contract mapa dak alaka pa Army Fresh Ration supply inyaka liasü. Pai civil works contract aika inyakogo südi aser pai inyakba mapa majung asü ta tenüng menük aluba mangashika. Ano pai Logging business-a inyak südi. Yamaji business tapu ajak inyakdangba aser pai inyakba mapa ajak nung takok ngua aser tajangzük keta inyakba takotet nisung asen Aor rongnung pa asütsü südi ta nibo bilemer.
Onok college nung azüngdang aser mapai yir külena talisa election mapang nung candidate aika pa dak nungi sen teyari agiba aser pai ajak nem mokurui sen lemshibasa angashia aru. Kija aser arogotema aika yariba ngua aruogo. Student tem-a aikati pa nungi teyari angubasa angashi.
Pai yamaji mokurui Yimden, Arogo, kibong aser kija aika yaria aruba temoatsü ano pa nem Tsüngremi maneni moatsüba rongsen nüngmatet jenti nung amshia arur pai Aor dang masü saka Naga kin aria bilemba agi shiranger Assam aser India limai sickmani (sick man) motetertem asoshi lenmang lapokja Dimapur nung Zion Hospital aser Research Center ya par kija sen agi lapoktsü. Iba Zion Hospital nung jentipur taneptsü nguogo aser taküm kümzükogo aser oda Tsüngremi adakzüktsüba arishi tempangba purtembo Zion nungi mepaidoktetba Zion lenia ogo.
Yamaji mapa kanga tuluka inyaktetogo ta tenüng sanga repranga liasü saka ano taoba mapa dang nungi kanga agi tuluba aser tasakba mapa ka tang Eden Medical Center lapoktsüogo. Zion Hospital nung maliba talisa Cancer anepaludak Nagaland nung mezüngbuba Hospital lapoktsüogo. Sensaker kibong nungi adok aser zünger Govt. mapa nung dang inyakji nibo Business inyakertem yagi sen koma ser kwika ajangteter aji merajemtet, anungji okola Yashitsungba ket nung akaba sen ajak agi Zion Hospital ya lapok südi ta bilem saka ita dangbo nüngjang petinu ang teperangba ta asüba ama Zion dangbo Eden ang tuluba lapoktetogo.
Okola Yashitsüngba taküm aser pa mapa reprangdangra alima tsüngdang asen Aor nüma dangtettsüsa mapa paikati inyakteta aruogo aser tang arishi küm 90 tashi jungaka maneni nübor asoshi inyakdagi. Pa asoshi kecha konang nüngsang bushitsü menüngdaker kechiaser pai peria ajangzükogo. Asen akatsü kecha maka ta asüba ama pa makatsü kecha maka saka asen Ao Sendeni pa nem akhüm tetushi “Life Time Achievement Award” (Takum Piyong Ajangzüktetba Konang Tetushi) kabosa agütsütsüla ta nibo bilemer. Laishiba nung shia aliba tenemsür metsü aser Lir anasüa anaprongla pai koktetogo aser Tsüngrem taochi nung kobika alitsü memetet saka pa arishi taküm alidang asen Aor tenüng nung pa shitettsüla aser asen Aor lanurtem pa tsüngsü nung aika adokdakjang ta pa nungi temoatsü agizüktsüsa memenui Ao Sendeni asen Aor sentsü ka ama angateta iba mapa ya inyaktsü junger masüno ta kü tangatetba lemsateper.