Taküm piyong Tir inyaktsü Xi Jinping nem maongka agütsür

China,Metsüremi 11 (Agencies) : Küm metsü shi tejaklen governor ka ama ochimashiba dak sendakba tebilemtsü agi neneter liaka iba khuretji kokteter külen taoba lenir Mao Zedong den atishia yimten tashi tulu amshitsüsa Xi Jinping-i China lenisüba nung alizüng tulu ka tongtetogo.
Linük temzüng nung tir inyaktsü atema kümsük taren latetja aliba agientsü atema tanü Amungü parliament-i agizükogo anungji tang Xi nem yimten tashi tuluba agütsür.
Tang koba linük temzüng yanglushitsü atema agizükogo, iba nungji ajemdaker Xi nem pai kobika inyakner iba tashiji chuba ka ama yimten tashi amer linük yimsü asütsü atema maongka agütsür.
Taoba Mongputeni (October) ita party congress pur küm pongu nung khen aliba senden alidang par party nung tanabenren general secretary inyaktsü atema Xi nem maongka agütsüba sülen pai tashi tulu amshia arur.
Mao-i aniba Communist purtemi 1949 küm tashi amer yimsü asütsü tenzükba sülen asoba China nunger lenir mezüngbubaji Xi lir.
1969 küm county-level party secretary ka ama inyaktsü tenzükba sülen 1999 küm Xi ya coastal Fujian province nung angh inyaktsü maongka angu; ajiser 2002 küm Zhejiang province nung aser 2007 küm Shanghai nung party chief inyak.
Iba sülen ‘Politburo Standing Committee’ nung inyaktsü pa shimtet.