Taküm, rongsen aser ozüng

Alima nung asenok meimchirtem taküm alitsü asoshi rongsen nüngdaker saka aiben asenoki rongsen kija agibo taküm malir ta mangatetter. Ibayongji mebilemdangi rongsen bushidang asenok taküm dang masü saka tangar taküma dena samatsütsüsa ataloker. Iba amaji mataloktsü atema yimteni ozüng latetter aser iba ozüng kübokji dang rongsen bushitsü aser rongsen amshitsü melar. Ajisüaka, item ozüngtemjia ozüng yanglurtemi anir mebenshitetter anungji raksatsü meranger. Iba ama pei ajung asaa inyakba ajanga tangar dena lendongi idaktsüba tatalokba ka, tang Meghalaya nung ali telonglen mijang bushia tuyonga alurtem parnok ayanger nisung 15 tashi December 13, 2018 nü tzü agi atsüngbanger madoktet samaogo. Atangji, tang tashi Indian navy aser Odisha nungi firefighters aser tzü adokba pump tesashi yanglur Kriloskar Brothers Limited teloktemi anir akok tashi mijang tuyonga aluba ongken nungi tzü mesepteta endokdagi saka ongkenji feet 370 tashi lua onsara tarok aser ali telonglen nungi aruba tzüji onsara tesashi asüba agi tzüji atsüteta endokaka meindokmai tanü tashi nisungtemji mengui bushitepdagi. Joko, parnokji ali telonglen ongken nungji tzü agi atsüngbanger anogo aika süir asünungji, parnokji tang tashi taküm alitsü tabo shingaia mebilemer saka tasümangji danga ngua agitetra kinungertem temulung terabo anisüngzüktsü ta asüba tangatetba nung tebushirtemi kanga meranga bushidagi. Atangji, ali telong nung akaba mijangji asenok asoshi rongsen, anungji itemji agiteta alima nung alirtem ajangzüktsüsa amshitsübaji tim. Ajisüaka, tang amaji ayangertem taküm mesamai rongsenji agiteta amshitsüsa ozüngi tekümdangtsü lenmang tajung latetja lir. Item ozüngtemji angaa kodang asenoki rongsen angutsüba len dang masü saka inyakertem lendongi maitsüsa inyaktsüba tsütsü bilemdanga inyakdir, iba jagi nübortem asoshi shitakba temoatsü küma inyaktettsü.  Aji oda, alima tesem aika nung ali telong nungi agitetba mijang tsüka light adokdaktsür aser iba light tashi jagi nisungtem nem temoatsü aser anisüngzük agütsür. Joko, Nagaland nunga tesem aika nung ali telonglen aliba mijang bushia atu tenzükba asenoki angur. Ajisüaka, asenok asoshia shisabolutsü kaji,  Meghalaya nung ama asen lima nunga mijang atubaji ozüngi latettsüba amato masü saka ayangertem lendongi maitsüsa kecha terenemba aser tenokdangba melii koya longki ama ali telongleni tupet tuyonga aluba angur. Tanga lima nung mijang atuba yimya reprangdangra, ali tuyonga aoba den külemi ali agi menembangtsüsa yin agi ki süyonga aoer aser iba denji sademsadema inyaktsüsa light tesangwa enokyonga aoba angur. Iba amaji kanga kümdanga inyaker külena ayangertem lendong ajurur. Ano, mijang atuba ajanga ayangertem dang masü saka nübortem ajak takoksa ngudaktsüba mapa kaji, mijang atuba anasa aliba ayong nung tzü ajakji miim kümadoker, anungji mamshitetter aser iba temeket nungji süngdonga memeyir. Iba jagi asen lima nunga tesem karbo joko nisung alitsüla masü kümogo aser yimtsüng karbo memenui aienshitsüsa akümtsü. Ano, mijang atudakji dang masü saka mijang bendena ayudak ‘Coal depot’ tesem tashi nunga tzü mopong menendaktsüba asenoki metettsü. Iba jagi, iba ama mijang bendenba tesem aser auyi adokdaktsüba mapatembo nübortem teti oli aruli senzüdak lenmang lenjang anasa mamenoker. Tanü asen nübortem aika pei bok mesüngtet aser pei kibong memesütet sensak tia nung lir, anungji parnok jagibo pei boksüng ngura ojang ta asüba nung pei taküma mapayui mashi tesem nung mashi mapa inyaka ayanger. Tang Meghalaya nung ayangertemjia item ama sensaker ayangertemji lir. Item tiaji government-i reprangtettsüla aser sensaker ayangertem takar aser tulur rongsen bushirtem mapa nung taküm maotsüsa ozüng latettsüla aser latetbaji mapa küma inyaktsüla. Ibaji atema government alir.