Taküm Tsüngkümtem

“Kechisarena asoshi Tsüngküm ka lir, aser anüng kübok mapa ajak asoshi mapang atakteta lir” Sayu 3:1.
Tsüngremi tsüngküm pezü balala yanglu, saka taküm indaktsütsü asoshi item tsüngküm pezü külemi mapa inyaker. Metsü tsüngkümji taküm tasen adokba. Miyi mapang ina tejang atangba mapang.Mankonang mapangji aluruba mapang lir. Mapa inyakertem pei mapa nung taa anguba mapang. Tsüngküm mapangji tashi meiti akümba mapang lir. Taküm tebur tajung mapang süitemba mapang. Item tsüngküm melentepa aruba jagi taküm nung tongtipang lesson agütsür.
Tsüngremi yimya nung tsüngkümtem sentong yangluba ama taküm nunga tsüngkümtem yanglur. Taküm nunga metsü mapang lir. Kodang asenoki mapa tasen ka tenzükdir iba nungi tajangzük angutsü imlaa atar. Miyi mapang nung asenoki timtem arema asen nem nungloktsüba mapa meranga inyaker. Mangkonang mapang asenoki meranga inyakba nungi süngjang aonger. Tsüngküm arur, taküm mapa tatembang kati arur. Kenken tsüngküm mapang nung timtem bener arutsür, saka metsü mapang nung timtem ajak süitema aotsü asenoki imlaa atar.
Tsüngremi asenok taküm asoshi tabensa sentong yanglutsür, mapa inyakba mapang aser iba nungi tajangzük agiba mapang Pai renemtsü. Süngjema alitsü aser anisüngzüka alitsü mapang Pai renemtsü. Anogo shia kasa mapaji tamang katetta inyaka alitsü. Kenü Pai asen mapa züngdangner. Saka ano jangratemtsü aser tasen tenzüktsü mapanga Pai renemtsü. Tsüngrem taochi ajanga asenoki metanga inyakba mapa nung aluruba mapang alitsü.Tsüngrem taochi ajanga asenoki timtem aser tejashi temekong tsüngküm nunga tenzüktsü, kechiaser tsüngküm melii metsü mapang alitsü makok. Yimya nung tsüngkümtem amaji taküm nunga Tsüngremi mulungba abensaa inyaktsü taküm tsüngkümtem lir.