Taküm tzüngluruwa mapang India nung nisung 1,900 asü

New Delhi, Mongputeni/October 04 (Agencies): Taküm tzüngluruwa mapang India kübok state 22 nung nisung lakh 35 dak tema tzümetsüng agi kongshi aser nisung 1, 900 jungnüa süogo; iba dak alia nisung 46 samaogo, ta Hokolbarnü Union home ministry nung ketdangsertemi metetdaktsü.
Maharashtra nung nisung timba (382) asü aser West Bengal nung nisung 227 asü, aser tzünglu, anentsüh aser tzümetsüng agi district 357 kongshia liasü.
Ketdangsertemi ashiba agi, item lendong nung nisung 738 yiru aser kiset shiruru 20,000 shi samaogo. Iba dak alia tzümetsüng agi ki lakh 1.09 raksatsü, ki lakh 2.05 shi tera raksa aser aluyimba li hectare lakh 14.14 nung tsünüsempongtsü raksatsü.
Tzüngluruwa mongpu September 30, 2019 nü tembangogo, ajisüaka tang tashi linük tesem kar nungbo tzüngluruwa mongpu ano mesüi, ta ketdangsertemi metetdaktsü.
India nung tzüngluruwa ita pezü tsüngda 1994 küm sülenbo tang mezüng tzünglu timba aruogo, ta India Meteorological Department-i metetdaktsü.
Maharashtra nung tzümetsüng agi district 22 kongshi aser lendong balala nung nisung 382 asü, nisung 369 yiru aser nisung lakh 7.19 relief camps nung jenoka liasü. West Bengal nunga tzümetsüng agi district 22 kongshi, nisung 227 asü, nisung 37 yiru, nisung pezü sama aser nisung 43,433 relief camps nung jenoka liasü.
Tang Bihar nung tzümetsüng lendong nung nisung 161 süogo aser nisung lakh 1.26 relief camps nung jenoka lir.
Madhya Pradesh nunga tzümetsüng lendong balala nung nisung 182 asü, 38 yiru, nisung tenet sama aser nisung 32,996 relief camps nung jenoka liasü.
Kerala nunga tzümetsüng ajanga nisung 181 asü aser 72 yiru. State nung nisung 15 sama aser nisung lakh 4.46 relief camps nung jenoka liasü.
Yamaji Gujarat nunga nisung 169 asü, 17 yiru aser nisung 17,783 relief camps nung jenoka liasü. Karnataka nunga tzümetsüng lendong ajanga nisung 106 asü, 14 yiru aser 6 samaogo. State nung nisung lakh 2.48 relief camps nung jenoka liasü.
Maneni Assam nunga tzümetsüng ajanga district 32 kongshia nisung 97 asü aser nisung lakh 5.35 relief camps nung jenoka liasü.