Taküm yanglushidak Quarantine !

Corona virus tashidak mesen menar alitsü akoka ta temulung melemi bilemba nisungtem anogo terpezü government-i tesem balaka nung mongdaktsüba mapang ya tamongertem ajak asoshi taküm yanglushiba mapang ka asütsüsa, tamasayongi, government-i bilema anepalutsü junger. Atangji, tang tashibo Nagaland nung telidak purtem shinga daka iba Covid19 tashidak putetba maliba agi, Nagaland nungbo quarantine mesemteta aliba tesemtem nung amongertem ya bendanglen nungi arurtem dang lir. Item rongnungji asenoki Chennai, Goa, Bangalore, Haryana, Delhi, Kolkata, Kerala aser Rajasthan ama tesemtem nung alir, Naga nungertem arua quarantine center balala nung amongba asenoki osanga tapu aika angashiogo aser noksa nunga nguogo. Naga nungertem, talisa lanurtem paikya India tesem balala nung azünger aser peisasa oa mapa inyakertem lir na ta kanga tenük sünga repranger. Shitakba agi, parnokjiang Nagaland asoshi tebilemtsü agütsürtem masü saka teyari agütsürtem lir, anungji bendanglen pei kija mapa meinyak, kaketrejuia mao shisabolua mekazünüba agi pei ki aser kinungertem bushia arurtemji asenoki pelashiashia agizükdi. Atangji, Naga nungertem India tesem balala nungi pei ki bushia arunertem Nagaland state government-i anepalua anir arur aser marutsü purtem nema tang tashi nung sen meyirijang terasemsembo agütsüogo. Ano, parnok arua atongba mapanga akok tashi government tenüng nung ketdangsertemi achitajemtsü dena agüja anepalur külenang pei pei quarantine center-i yoker. Bendanglen nungi arurtemji külen bendang lima shirang tsübuseta aliba to pei lima atongba agi mulung anisüngzüker saka ano külen, pei ki matongser quarantine nung hopta ana amongtsübaji tezüdanga bilemer. Ano, tezüdangtsü kaji, tang tashi nung yabo quarantine center nung anogo 14 dak tali amongtsüsa akümer, kechiyong anogo 14 tsüngdaji tamongertem ajakji government-i tashidak tendanga result magütsütetter. Quarantine nung amongtsü purtem takümji iba ama tia ka nung lir ta meteta, parnok mulung pelaa mongdaktsütsübaji state khuret asütsüla. Atangji, iba ama tensa tia ya asenoki kodanga majurudang nungji, tamasa quarantine center ka mesemteta tenzüktsübaji tasak, ibayongji aiben tesem aika nung junga metenzükteti timtem ajuruba asenoki angur. Ajisüaka, government ta asüba ya mashi masü, government ta asüba ya ruling aser opposition otsü masü mesüra ita sen aser allowance aser commission otsüa masü. Government ya tensa tajung majung ajak nung nübortem lenjii oa parnok taküm pelaa yutsütsü asoshi tentetba lir. Anungji, tanüa quarantine tesemtem nung ayurtemji tebok sünga chiyongdaktsütsübaji dang masü saka parnok mulung pelaa yutsütsübaji government nung alirtem mapa lir. Tanü Nagaland nung quarantine center tapa ana lir, kar government-i repranger aser kar arogo aser lokti tentettemi repranger. Atangji, item ajakji government mapa saka tashidak nem mekokdaktsütsü asoshi arogo aser lokti tentettemia mulungsua pei rongsen aser nübo agi yariteper. Aji oda, shitakba agi governmenti anepaluba tesemtem nungji chiyongtsüa aser counselling-i tajungba angutsüla. Ajisüaka, government-i anepaluba quarantine center nung alirtem aiben chiyongtsü mapang shitak nung manguba , Covid 19 tashidak agi atongbabo putetter ser nung kibur dang medical report mesayutetba aser quarantine nung amongertem nüngdak ashidak makaba timtem aika atalokba angur. Shitakba agi itemji kata mataloktsüla. Aji oda, quarantine nung amongtsü arurtemji ajungbena arur masü saka asenoki parnok asoshi nüngdak ajak renemtsür anir arurtem lir, anungji anogo shia chiyongtsü agütsütsüba mapang dang masü saka sound system tajung yur sarasademtsü aser Tsüngrem o ashitsü mapang dena enoka zep ta yanglur agitsüla. Ano, quarantine nung amongertem reprangtsü aser nüngdak tongteprateptsü atema center shia tenendak, temeim aketba aser mapa nung temulung tagütsü government official ka Officer In Charge ka shimtsü aser qurantine center nung amongertem ajak whatsapp group ka lapoker, ibaji pa mesüra la ketdangsüba nung nüngdak metetpelatsü. Ashiko, quarantine nung amongertemji karbo yijemer, moko achir mesüra mozümora lartema alitsüa akok, item ama takümtemji Quarantine mapang nung taküm melenshir kidangi yoktsübaji government-i bilemtsüla. Itemji government nung inyakertemi mayimjemra, tang amato, talisa arogotem nungi teyari meshitsüla. Asenoki tang ama tensa nung, quarantine center nungi taküm tajungba melenshir pelashishia odaktsür asü mesüra tamajungba kümer jashiseta odaktsür, iba dakji tarutsü Nagaland tuluka sendaka lir ta süoki ia bilema inyakdi.