Takümbo Rahul Gandhi-i Lok Sabha menden ana nungi tokteptsü

New Delhi, March 23 (Agencies): Taküm Lok Sabha election nungbo Congress Party Tir, Rahul Gandhi-i menden ana nungi tokteptsü, ta osang angazüker.
Rahul Gandhi-i Wayanad Parliamentary menden nungi tokteptsü melungogo, ta Kerala Congress Tir, Mullappally Ramachandran-i metetdaktsü.
Iba menden ya Kerala nung party tashi itta aliba menden lir aser Karnataka den arrtsülen lir.
Rahul-i Lok Sabha election nung Uttar Pradesh kübok Amethi menden nungia tokteptsü.
Osangbenertem den jembidang Ramachandran-i, “Iba atema ya ita ka shi jembia aruogo. Tamasabo pai (Rahul Gandhi) memelungi liasü. Pa dang kanga mepishiba sülen pai melungogo,” ta metetdaktsü.
Karnataka, Tamil Nadu aser Kerala nungi Congress lenirtemi party bangdak lenirtem dang Rahul Gandhi south India nung aliba menden ka nungi toktepdaktsütsü atema takhangba agüja liasü.
Osangbenertem den jembidang Congress party otongdar tongti, Randeep Singh Surjewala-ibo, “Kerala unit party-i parnok taginüba lemsatep aser Rahul Gandhi dang par state nungi tokteptsü mepishi. Parnok temeim atema pelar. Congress Tiri iba atemaji bilemdangtsü,” ta metetdaktsü.
Kerala nung Wayanad constituency ya 2008 küm tenteta liasü. Tesüiba election ana nung Congress lenir, ML Shahnawaz-i anaben tashi takok nguogo, ajisüaka ita trok tejaklen pa mapang tatsüka shiranga aruba sülen süogo.
Congress lenirtemi ashiba agi, Rahul Gandhi-i south len aliba state nungi toktepba ajanga party nung inyakertem taliba ajungmesotsü.
Rahul Gandhi tetsü (otsüla) Indira Gandhi aser tetsü Sonia Gandhi natia India south len aliba menden nungi toktepa takok ngua liasü.