Talang nung anguba – T. Ken 73:18-28

“Nai ne shisatsü agi ni anitsü, aser tesülen sentsüwangshidaki agizüktsü” (t.24). Asaphi tarendak mapang ka ajanger külen iba tekong ya zülu, aser ibai pa temulung makai aruba tesüngmangtsü ka tembanga zülu. Pai tejangja temetetba kar angu.
Mezüngbuba, Tsüngremi asenok sotter. “Aji saka maneni ni ne den lir: Nai kü tajichi teka nung sot” (t.23). Tamajungeri azü tokshiba inyaktsü akok, peria akatsü akok, azükaru aser temoatsü akatsü akok. Saka asenok Tsüngrem aka aser pai asenok sotter.
Tanabuba, Tsüngremi anir. “Nai ne shisatsü agi ni anitsü, aser tesülen ne sentsüwangshidaki agizüktsü” (t.24). Tesülenbaji tongtipangba mapa lir. Tesülen kechi ataloktsü? Asenok Pa den teti alitsü ta asenoki jangjatsü akok. Iba temang nung tang takar süa aliba aser tarutsü taküm nung takar süa alibaji tera balala lir. Iba lima nung takar kar tarutsü aliba lima nung sensaker asütsü akok. Saka iba lima nung sensaker aika taruba lima nung takar alitsü.
Tasembuba, Tsüngremi asenok tashi itdaktsür. “Kü shi aser kü mulungjangi tamakok angur: saka teti Tsüngrem kü mulungjang tashi aser kü shilem lir” (t.26). Pezü, Tsüngremi asenok taküm jenjang ajak nung yarir. “Saka na anasa arutsü ni asoshi junger” (t.28). Asenok kong lidir liang, kechi ajanga odir oang, asenoki Tsüngrem anasai aotsüla. “Pa mapa ajak ashitsüsa ni Kibuba kü jenokdak kümdaktsüogo” (t.28).
Kotak nung Kibuba den ki ka akatsü tenangzükba agi asenok tasü itdaktsür. Tsüngremi na jenjang tulu agi alizük, aser Pai na kechisarena ajanga kümzüker. Kechi tejangja tenangzükbatem asenok aka!