Talen Lenpi Tzüla

I. Shilu Yaden,  Sangtemla Ward, Mokokchung.

1. OKILA:
“TALEN LENPITZÜLA” Tetezü, “Lenmang yanglushiba”
i.     TALEN – Lenmang
ii.    LENPI – Len (Lenmang) merüktetba
iii.  TZÜLA – Lenmang tongtipang kar nung tongtipangsa tsükma lenmang nung senzüsenponger ajak anisüngzüka anentsü SABANG (Süngsa) tajung yanglur iba anasaji tzü tajung ayong tajung nungi Longmi, Aou nung mesüzüka bener arua nübor jemdaktsütsü yanglua yutsür iba tangji “Tzüla” ta ajar. Item mapa asem senteper oboula nunger mapang nungi “Talenlenpitzüla” ta jembia aru.
Lenmang ya oboula nunger mapang nunga tongtipang liasü, tanü asen Putu nunga tongtipang lir. Nüngdak ajak lenmang peria ali nung dang inyakteter.
2. OBOULA NUNGER MPANG NUNGI TONGTIPANG LENMANG TA  ANEPALUA
    KÜM NUNG KENBO YIM NÜBOTOKA INYAKA  ARUBA :
i.    Alu lenmang (Ludi aser Pen)
ii.   Arem yatatsü lenmang
iii.  Tzüma lenmang
iv.  Kishi-kina den sendaktepba lenmang (Lenchit lenmang)
Item lenmangtem ya küm nung kenbo Putui tensa mapang apier yimkong ayongzüka kangtepa yanglu. Item lenmang yangludangbo Amitsürtemia pei akokba yari Sali aser sungolep bendaktsüa yaritep. Yimkong nübo toka tongtipang lenmang yangludangbo kishi-kina yimeria nüngdak aliyonga iba lenmangji ajangdanga mesenzü. Oboula nunger limapur yimsü nung alidangbo shirnok yim nübo tokba tesemji  ajanga süidir tekolak lepzüka iba lenmangji külema aru. Mangko mangu nunga Ak tulu ka agi küm shia lenmangji  külem. Iba dangji TALEN WALOK ta aja. Yamaji lenmangji kanga tongtipang ta oboula nungeri amshi. Kishi-kina den lenmang tesendaktep junga ali nung tang Aksü-mensü, Akang-jungshi sütep, aser yim o yim na tsüngda tesendaktep junga ayu. Par putu nung tetsüng lenmang dang liasü.
Tetsüng lenmang dang asüyonga lenmangji kanga aküm tsübua amshi. Lenmang tiyong nung scü, natsü, metsüh meintok. Saka lenküpok mesüra kilentsü (nalla) nung tang intok. Aseni intokba jana, nub, metsüh nungji yimkongi ajemshitsü aser asen temoatsü mangur ta parnoki tetya aser shitak atalok. Iba jagi oboula nunger mapangbo kechi inyakdir inyak-aka ochishia temolung agüja nendaka inyak.
3.  TANÜ PUTU : Tanü asen Putu nung tetsüng agi senzür mali saka gari nung senzür tang. Yim o yim na tesendaktep ajak gari lenmang agi sendaktepa lir. Anungji LENMANG ta asüba ya tang asen putu nung tongtipangba lir. Oboula nungerbo ainlen senzübaji tezüngtet tang senzü, saka tanü putu nungbo amang sangwa metitemi gari nung senzütsüsa akümer. Anungji tang putu nübortemi lenmang ya kanga junga  meima anepalua amshitsüla.
Gari lenmang ajak Government-i sen aika intoka inyaktsü lemzüktsür, saka teinyakertemi government-i aginüba ama lenmang inyakyimji meinyakra sen intok malang lenmangji yakta raksatsü, aser nübor tang akoksatsü. Lenmang junga yangluyonga kilentsü junga meyanglura lenmangji junga mamshitettsü, saka yakta raksatsü. Kilentsü (Nalla) shitak yanglura lenmangji teti temerük aser talangka amshitsü. Lenmang tejak (road surface) nung gari meshitoktsüla aser shitokshiraba tzü meyimdaktsütsüla. Iba jagi lenmang tejak  (road surface) yakta raksar.
Akok tashi shitokshiraba tzü ajak kilentsü nung yimdaktsütsüla.  Kechiyong lenmang tejak (black topping) manung tzü ayimba aser Nashi natsüh, scü, mejang itemji kanga meputep. Iba jagi lenmang melamela tang shizüka oa raksar. Tanü tensa nungbo nübor aikati lenmang nüngdakba aser lenmang mejungra nübor anisüngzük mali aser alima terenlok mali ta angateta arudaki. Anungji lenmang majungba tesemtem yimtsüng yimtsüng aser telok telok ayongteper pei sen intoka yangluteper. Ibai angudang kanga pelar aser temolung achir. Iba tangatetba nung  nübortem maneni ora asen limaji tejakleni aotsü aser libaliro nung temelenshi adoktsü. Alima renlokba ya reprangdangra lenmang tesendaktep junga aliba limatem renloker. Kishi-kina yimtsüng, linük den lenmang tesendaktep ali nung tang terenlokji adoker.
Kechiyong item linük nung jagi asen lima nung makaba oset bener arutsü, aser oset jenjanga ajema akümtsü. Item ajakji lenmang tesendaktep dakji tang keta lir. Anungji Lenmang ya asenok asoshi kanga tongtipang ta angateta pei aliba yimtsüng, Town nung lenmangtemji anepalua amshidi ta ayongzüker.
Tsüngremi tazünger ajak moajang.