Tali atsükba ajanga Odisha nung June tom tashi school shibanger

Bhubaneswar, April 25 (Agencies): Odisha tesem ajaklen tali atsükba ajanga Hombar nü state sorkari school tem nem mei sodi (summer vacation) agütsütsü sangdongogo.

Tali atsükba ajanga April 26 nü tashi school shibanga liasü, ajisüaka tsüngsang mopung memelenshiba ajanga school tanurtem nem mei sodi agütsüogo, aser June ita tom nungang school tanaben lapoktsü.

Special Relief Commissioner, Pradipta Mohapatra-i ashiba agi, school shibangba ajanga takoksa küptoktsü aser syllabus tembanga agitsü atema tesülen school temi class tali agisemtsü.

Tali tatsük akümba ajanga mezüng state sorkari April 11 nungi 20 nü tashi school shibang. Ano maneni April 19 nungi April 26 nü tashi school shibangtsü sangdonga liasü, ajisüaka tsüngsang temelenshi makai tali atsükba ajanga sodi mapang talangka agütsüogo.

Odisha anüdoklen aliba jila, Titlagarh nung Deobarnü, April 24 nü 48.5 degree Celsius liasü, aser ibaji linük nung temperature timtiba liasü.

Mohapatra-i ashiba agi, state nung tzüngluruwa mongpu imlaba dang nungi tekaraba arura school tanaben lapoktsü. School tanurtem nem mei sodi agüjaaka college aser temaba shisaliok rejutem nembo sodi magütsür.

Kümshia tali atsükba ajanga Odisha nung nisung timba-timba asür. State nung taküm küm tang tashi nung tatsük ajanga nisung 88 asüba osang lir. Tatsük ajanga yaküm state nung nisung 69 asü, 2014 küm nisung 40 asü aser 2013 küm nunga nisung 16 asü.