Taliban 11 nem tasüba temerenshi agütsür

Islamabad, Monupii 05 (Agencies) : Tawa küm ishika tsüngda tashiyim maparen balala nung nisung 60 tepsetba atema military courts-i aitsüba sülen kiralongrar tetsüti par 11 nem tasüba temerenshi agütsütsü ta Pakistan army chief-i tejangja metetdaktsüogo.
Tanü Küptoknü sepaitemi metetdaktsüba osang ka nung ashiba agi, kiralongrabaren nung shilem agiba atema ano nisung tepuokdak ayutsü asoshi Gen Qamar Javed Bajwa-isa temelaba agütsüogo.
Parnokisa ashiba agi, tang aitsüba Pakistan nunger Taliban telungpur par terka jagi linük nung inyakba tashiyim maparen balala nung civilian 36 aser sepai 24 tepset.
Sepaitemi par okadak asüngdangyaba mapang nüburtembo shinga arutsü memelar saka temeten bushirtem nemji tema nungi okatsür anir aruagi jembidaktsütsübo temelaba agütsür.
Pakistan nung tasüba temerenshi agütsüba maparen ken anena liasü saka 2014 küm Peshawar yimti nung aliba kaketreju ka amakdang kaketshir tanurtem teimba ser nisung 150 tepsetba sülen ibaji agien aser asentenshir Pakistan sepaitemi par sasep nung telungpurtem anir aruagi asüngdayar külen obendang agütsür.