Taliban-i Afghan tepuokdak puoka alir nisung noklang aika jendaktsü

 

Kabu, September 14 (Agencies): Taliban telungpurtemi Afghanistan anüdoklen tentetba tepuodak ka amakba sülen idakji puoka alir nisung noklang aika tanü Hombar  nü jendaktsüba osang jangjaogo.

“Peisasa pokseta asütsü mulungteter züngsem kati bomb alenokba car gari ka amshia tanü tepuodakji amaktsü tenzük,” ta Eastern Ghazni province nung deputy provincial governor, Mohammad Ali Ahmadi-i osang jangjashitsü.

Taliban teloki tan amakba tepuokdak telung nung nisung 436 tashi puoka liasü aser parnoki tepuokdak telung nung puoka alir nisung 355 tashi jendaktsüba osang jangjaogo ta pai ashi.

“Tan ajener rong nung parnok 148 tashi Afghanistan linük nem lendong tesashi bener arutsürtem aliba osanga jangjaogo,” ta pai shisem.

Tan amakba lendong nung tepuokdak anüker 7 asüba aser parnok 7 yiruba den külemi, amakertema nisung 5 tashi tepsetba osang jangjaogo ta Afghanistan interior ministry-ia metetdaktsü.

Ano külen, “Afghan intelligence agency-i ketdang asüba tepuokdak telung nung puoka alirtem kanga mejungi rishikangshiba yong ozü teloki tanü tepuokdakji amak aser tepuokdak telung nung alirtem jendaktsü,” ta Taliban telok otongdar, Zabihullah Mujahid-ia tanü amakba atema tenüng agia metetdaktsüogo.

Paisa ashiba agi, tanü jendaktsür rong nung tongti Tabilen lenir aser züngsemtema densema lir.

“Peisasa pokseta asütsü mulungteter 10 densemba telok tanü yoka tepuodakji amakba sülen parnoki tepuokdak telung nung puoka alir nisung 400 shi jendaktsüogo,” ta paisa shisem.

Taliban teloki taoba mapang nunga Afghanistan nung tentetba tepuokdak puoka alirtem jendaktsüba osang bushiteta lir.

Par teloki Afghanistan nung tepuokdak tulutiba, Sarposa nung puoka alir nisung 500 shi 2011 küm April ita jendaktsüba osanga bushiteta lir.

2008 küm June ita nunga tongpang nung amshitsü assault rifle aser rocket kadoktetba prangpong abenba Taliban telok kati tan amakba tepuokdak puoka alir nisung 1200 tashi jendaktsüba osanga bushitetogo.