Taliban-i Afghanistan nung nisung 13 poksetdaktsü; 14 yirutsü

Afghanistan kübok Jalalabad yimti nung peisasa pokseta asütsü mulungtetba Taliban züngsem kati pokshiba lendong tesashi ka atalokdaktsüba sülen Afghanistan mitkartemi lendong atalokdak bushisüngdangba noksa nung angur. (Jalalabad, January 17)

Kabul, January 17 (Agencies): Peisasa pokseta asütsü mulungteter kiralongrar kati pa temang nung alenokba bomb pokdakja Afghanistan kübok Nangarhar province nung lendong tesashi ka tanü Deobar nü atalokdaktsüba osang ka Nangarhar provincial sorkar otongdari metetdaktsüogo.
“Tanü amaksangi Jalalabad yimti nung alir tongti Nangarhar provincial council züngsem, Obaiduallah Shinwari’er kidang lendong ataloktsü saka Shinwari-bo iba lendong nungi jenbo,” ta pai ashi.
Tan lendong nung ishiba agi nisung 13 poksetba aser nisung 14 shi yiruba osang jangjaogo ta pai shisem.
Taliban teloki tashiyim agi ita 9 tashi pua yur chioksang, Shinwari tenu, Saminullah den ajuruteptsü asoshi yimtsü yimbotem Saminullah’er kidang sentepa alidang tanü pokshiba lendongji atalokdaktsüba osang jangjaogo.
“Tanü lendongji ozü teloki atalokdaktsü,” ta shia, Taliban teloki tanü lendong atalokdaktsüba atema tenüng agia metetdaktsü saka iba amakba maparenji kechi mechi inyak iba osangbo memetetdaktsü.
Shinwari’er ki ya Islamic State (IS) kiralongrartemi nisung 7 tashi pokseta tan Bodbar nü lendong atalokdaktsüdak, Pakistan consulate anasa lir.