Taliban-i Afghanistan police 12 ola madokba prongpong agi khaset

Kabul, February 28 (Agencies) : Afghanistan anüolentip province kübok Helmand tesem nung aliba Taliban telungpurtemi Mongulbarnü checkpoint ka ola madokba prangpong aser hand grenade tem amshia amakdang police 12 tepset aser prangpong o injang auyaa bener ao, ta ketdangsertemi ashi.
Ajisüaka province ketdangser kari ashiba agi, iba amakba nung police-a densema alitsü akok kechiba süra tang tashi nung guard rongnung ka mangur.
“Police rongnung kari Taliban aitdakja iba lendong agütsüdaktsü asü masü ibaji metettsü asoshi bushisüngdang tenzükogo,” ta pai ashi.
Tan amakba Province yimtiba, Lashkar Gah nung ya ‘opium’ yanglur aser Afghanistan security force tem teti lendong bang nung alir kechiba süra iba tesem nung district aika Taliban telungpurtemi amanglema lir.
“Taliban telungpurtem jagi mezüngbuba nung guard ka ola madokba prangpong agi khaseter parnok check post telungi ai,” ta Helmand deputy police chief Haji Gulai-i osangbenertem dang ashi.
“Iba sülen parnoki anünga aliba police tem dak hand grenade poklokja tepseter külen police tem indang prangpong aser injangtem auyaa bener ao,” ta pai ashi.
Ano tatalokba balaka nung Marjah district, Helmand nung gondha ka shi raraba sülen police 12 tepsetogo, ta Taliban otongdar Zabihullah Mujahid-i ashi.
Taliban telungpurtemi tang ya Helmand tesem tuluba ka amanglema lir aser iba nungji Lashkar Gah-a densema lir. Britain aser U.S. force temi 2001 küm Taliban samatsütsü merangdang parnok tasüba timtiba atalokbaji iba tesem nung liasü.
Afghanistan security force temi tang linük noklang nung shilem 60 dang tajemba ayimbanga lir, Taliban-i shilem 10 aser tanüngba tesemtemji telungpur telok balalai amanglema lir, ta US-i asadangteta lir.