Taliban-i amakba lendong nung Afghan sepai 23 asü

Kabul, Metsüremi/March 02 (Agencies): Southern Afghanistan tsütsü Helmand province nung mitkartem aliba tesem ka amakba lendong nung Afghan sepai 23 asü, ta ketdangsertemi ashi.
Afghanistan nung mitkartem aliba tesem tulutiba rongnung ka ta züngshia aliba Shorab military base nung anepdang mesangwajungi ghonda aika amakba lendong ya Taliban teloki tenüng agiogo.
Tesüiba ghonda 48 tsüngta Taliban teloki iba tesem asemben tashi atsüngdoktsü meranger, ta ketdangser ajanga ashi.
“Iba operation tembangogo, sepai 23 asü, 15 yiru aser telungpur 20 tepset,” ta Ministry of Defence indang odongtar, Ghafoor Ahmad Jawed-i ashi.
Iba province nung governor indang odongtar, Omar Zwak-ia iba osang ya jangjatsüogo.
US-i yariba missiona, koba Afghan sepaitem den külemi inyaker, parnoka iba base nung lir saka parnok ya complex balaka nung alir. Taliban temi US aser international sepaitem aliba indang jara ajanga compound telungi motet aser parnokbo kümzüka lir, ta sepai ketdangsertemi ashi.
Afghanistan nung mapang takangka rara aruba anentsü asoshi Qatar nung US aser Taliban ketdangsertem yimjung ken o jembiaka Taliban aser bendanger sepaitemi yariba sorkar sepaitem tsüngta raraba tajemba makümer.
Raraba tesem nung Afghan sepaitem aika taküm samar. September 2014 küm tir akümba sülen linük nung sepai züngsem 45,000 taküm samaogo, ta Afghanistan Tir Ashraf Ghani-i January ita metetdakja liasü.
Taoba mapang British airbase Camp Bastion amenoka aliba Camp Shorab aser Helmand nung US Marine Corps tejenba amenoka aliba Camp Leatherneck nung maneni amakba ajanga Taliban teloki sepaitem aliba tongtibang tesemtem nung amaktsü tashi lir ta sayuteter.
Taliban-i Shorab nung amenoka aliba US aser Afghan sepaitem den raraogo, ta metetdaktsü.
“Tsükchirtem aika khasetogo mesüra yirutsüogo aser maneni rarar,” ta Taliban odongtar Qari Yousuf Ahmadi-i sangdong ka ajanga metetdaktsü.
Taliban telok den yimjung ken o jembiba renloka aoba mapang Afghanistan nung US sepaitem tajemba kümdaktsütsü sentong lir, ta US Tir Donald Trump-i shia lir.
America nunger sepai 14,000 den külemi NATO indang Resolute Support mission nung linük 38 nungo sepai 8,000 shi longjemer Afghan sepai nem training aser teyari balala agütsür.
Taliban teloki Helmand tesem tuluba amokbanga lir. Alima nung ozüng alema opium shibelenba ya iba province nungi timba adoker. Linük balalai Afghanistan nung Taliban anema raraba mapang iba province ya tamajungtiba liasü, kong nisung 1,000 jungnüa taküm lalua liasü.