Taliban-i amakdang Afghanistan sepia 135 asü

Kabul, April 22 (Agencies) : Taliban telungpurtemi Balkh province nung aliba Afghanistan Army tesep ka amakba mapang tajemba agi sepia 135 asü aser 60 tashi yirutsü, ta Honibarnü ketdangsertemi ashi.
Hokolbarnü 209 Shaheen Corps Headquarters amakba mapangji Taliban telungpur-a parnok nisung 10 tashi asü. Iba tesem ya Mazar-e-Sharif yimti nung military tesep tulutiba rongnung ka lir, ta ketdangser kati ashi.
Iba lendong Taliban teloki tenüng agiogo.
Ketdangser jagi ashiba agi, tasübaji ano timba akümtsü kechiba süra tang yirur alirtem rongnung karbo tasü taküm tsüngda kangshidar.
Defence Ministry otongdar Dawlat Waziri-i, Muslim yimsü nung Hokolbarnü agiba sarasadem agia aliba mapang Taliban telungpuri army sobutsü sobur sepaitem tesep alidaki aita amak, ta ashi.
Parnok military garitem nung ait aser sepaitem tekülem kidang sarasadema alidak injang agi akhatsü tenzük. Telungpurtem jagi rocket-propelled grenades aser rifle amshia amak.
Otongdari ashiba agi, sepaitemia telungpur 10 khaset.
Tanü Taliba teloki inyakba mapaji tamangba yimsü ajak anema inyakba mapa ka lir, ta Afghanistan CEO Abdullah Abdullah-i aija ashi.
Ano tesüiba mapang Tir Hamid Karzai-ia, “Ni tanü Mazar-e-Sharif nung sepia tesep maka linük sepia tasü tait aika tepsetba aser yirutsüba mapa sashia aitsür,” ta tweet asü.