Taliban-i Kandahar Airport amak; 37 tepset, 35 shi yirutsü

Kabul, December 09 (Agencies): Tongpang nung amshitsü prangpong abener Taliban telungpur telok kati yasüng, Mongolbar aonung nungi tenzüka tanü Bodbar nü tashi Afghanistan anülulentip tsütsülen tentetba tongti tayimtsü anendak amakba osang jangjaogo ta Afghan sorkar aser Taliban telok napronglai tanü Bodbar nü metetdaktsüogo.

Peisasa pokseta asütsütsü mulungtetba Taliban züngsem 10 shi Afghan mitkar sübotsü agir North Atlantic Treaty Organization (NATO) miktar’er Resolute Support Mission tentetdak, Kandahar tayimtsü anendak amak ta parnoki ashi.

Tan amakertemi yasüng nungi tenzüka tanü tashi nung ishiba agi nisung 37 shi tepsetba aser nisung 35 shi yirutsüba osang tang tashi nung jangjaogo ta parnoki shisem.

“Afghan aser NATO mitkartemia tan amaker nisung 9 tashi tepsetba sülen tang amaker kati teloktep mitkartem den maneni tongpang raraba osang jangjaogo,” ta Afghan defence ministry-ia metetdaktsü.

Taliban züngsemtemi tayimtsü anendak tentetba mitkar tesep telungi aiba sülen idakji alir Afghan aser bendang linük mitkar züngsem 150 shi tepsetba osang ka Taliban telok otongdar, Zabihullah Mujahid-ia tanü metetdaktsü.

Ajisüaka, tanü amakertemi mitkar züngsem ka danga tepsetba osang tang tashi nung bushiteta mali ta NATO otongdar katia metetdaktsüogo.

Afghanistan aser Taliban telok na tsüngda maneni yimjung senden amentsü ajungshitsü aser tongpang kanga sashia raradak, Afghanistan indang rongsenren aser linük kümzüka alitsüren jenjang tajunga kümdaktsütsü nükjidong nung Afghanistan nungitba lenirtemi Pakistan nung ajurutepa Afghanistan den sentakba senden amen tenzükba mapang ka nung Taliban teloki tan lendong ya atalokdaktsür lir.