Taliban-i Trump dang Afghanistan Policy reprangshitsü ashi

Kabul, January 22 (Agencies) : Taliban-i US Tir Donald Trump dang Afhganistan nung America nunger policy reprangshir bendanglen nungi arua aliba sepaitem ajak atsüngindaktsütsü shiogo, ta Deobarnü osangbenertemi metetdaktsü.
Hokolbarnü Trump Tir mendeni atuba sülen Honibarnü Taliban-i, sorkar tasenbaia taoba Tir Barack Obama aser George.W. Bush na tsüngnep nung jajara Afghanistan nung azü tokshiba manentsü, ta sangdong ka ajanga ashiba osangkakettem nung metetdaktsüogo.
US-i aniba bendanger aser linük sepaitemi amakba ajanga küm 16 tsüngda nung teraksa aika adokogo, taküm jenti laluogo aser sen billion aika alang takoksa ajuruogo. Parnok mapa ajanga Afghanistan sembatsüsa atongtet, ta Taliban-i ashir.
Afghanistan nung Chief Executive Abdullah Abdullah-i, Afghanistan nung kiralongrartem den raratsü atema Trump-i US sepia maneni yoktsü nendaka bilemba pela agizükogo.
Afghanistan nung rara tenzükbaji September 11, 2001 nü America Twin Tower amakba ken o nung aija alisang, tesüiba Al Qaeda lenir, asür Osama Bin Laden bushitsü mechi nung Taliban anema Afghanistan nung pakokba ajanga lir, ta osangbenertemi ashi.