Taliban-i video ka nung parnoki pua aliba nisung ana sayu

Kabul, January 12 (Agencies) : Afghanistan Taliban teloki video tasen ka sayaba nung parnoki yaküm pua ayuba America nunger ka aser Australia nunger ka ta sayuogo.
Brihostibarnü Khaama press ajanga metetdaktsüba agi, parnoki pua aliba nisung anaji, ka Sydney nungi English tesayur Timothy Weekes aser ka US nungi professor Kevin King na lir.
Bodhbarnü sayaba minute 13 talang video nungji tenati tang US Tir atema shimteter alisang Donald Trump dang tena chioktsü asoshi telungpur den mapa teinyaktsü tim inyaktsü ashiba tangoka lir.
Tenaprong ya Kabul nung aliba American University of Afghanistan nung tesayur teinyakdak nung yaküm August ita Kabul anüolen tsütsü gari nung oyaa lia pua bener ao, ta osangbenertemi ashi.
Weekes-i, “Sir, Donald Trump iba tebilemtsü ya nü kabu nung lir… Onok yangi mapang talangka ali nungbo parnoki onok tepsettsü. Ni tang mesüner,” ta Trump teyari meshia shia lir.
US State Department-i iba video dak sendakba nung ano kecha mashi.
Australia Foreign Ministry-i, August 2016 nung pua aliba Australia nungbaji chiokdaktsütsü asoshi onoki tanga sorkartem den maneni inyaktepdar, ta ashi, ajisüaka parnoki iba nisung indang taküm kümzüktettsü mesüra mekümzüktettsü atemabo kecha meshisem.
Taliban den tesendaktep tajung aliba Haqqani telungpuri tesayur ana pua lir, ta ketdangsertemi ashiba Khaama Press ajanga metetdaktsü.
Afghaniatan nung ketdangser tain kati, anüolen linüktem nung sorkari pua aliba Taliban telungpur aser temesüng nisung yagi pua aliba na melenteptsüji Kabul-i metizüktettsü, ta CNN dang ashi.