Taliban lenir Akhtar kahsetdang süsemsang kinungertemi ochi obendang akhanger

Islamabad, May 29 (Agencies): Tan ita tetenzüklen Balochistan tesem nung US drone agi maka oa Afghanistan Taliban tekolakba Akhtar Mansour tepsetba mapang süsemer taxi anishir kinungertemi ochi obendang khanga, US anema Deobarnü police nem case ka agütsüogo.
US drone-i Quetta anasa Taliban lenir Mansour tepsetsü atema amakdang, taxi anishir Muhammad Azam-a tepsetsem. US-i amakba mapang Akhtar Mansour ji Muhammad Azam-i anishiba taxi nung mena liasü.
Azam ya tanur pezü tebu aser kibong rangben pai aaba agi dang mesüa liasü.
Drone agi amakdang dena alir US ketdangsertem nem temerenshi dalang agüjang, ta asür kinungertemi takhangba ka agütsüogo.
Muhammad Azam adianu Muhammad Qasim-i tama Quetta kübok Noshki district police nem first information report (FIR) ka agütsü, ta Dawn online osang ajanga metetdaktsü.
“Ozüi ochi obendang aginer,” ta Deobarnü Azam tebu tanubu Haji Khuda-e-Nazar-i ashi.
“Onoki drone ketdangsertem obendangdaki arudaktsütsü akhanger. Azam dak kecha tai mali aser pa kiralongrar telok kecha dena tesentaktep maliasü,” ta par kinungertemi ashi.