Taliban teloki Afghan police pongu khaset

Kabul, June 18 (Agencies): Afghanistan anüdoklen aliba Gardez yimti nung police headquarter kati Taliban telungpurtem ia amakba mapang police tanishir pongu asü, ta Afghan interior ministry osang ajanga ashi.
Deobarnü iba kasa lendong nung police tanishir 9 aser civilian 13 yiru, ta Paktia province police tekolakba indang odongtar, Sardar Wali Tabasim-i osangbener dang ashi.
Iba police headquarter nung Afghanistan eastern province indang regional command indang ki lir, aser Taliban telungpur 7-i iba lendong agütsü aser item telungpur ajunga iba headquarter nungsa khaset, ta Tabasim-i metetdaktsü.
Iba lendong ya Taliban teloki agütsü, ta Taliban odongtar, Zabihullah Mujahid-i sangdong ka nung ashi.
“Item telungpur temi mezüng police headquarter indang gate tuluba nung gari bomb ka pokdaktsü aser iba lenmang ajanga telungpurtem ia police dak amak,” ta osangbener kati ashi.
Muslim nunger temeshi ita, Ramadan tenzüker Taliban teloki Afghanistan nung mitkar aser police aliba tesemtem nung lendong tesashi agüja arutagi, aser bendanger mitkar temi Afghan mitkar yarirtem densema item teloki amaker.
Taoba Honibarnü iba ama lendong ka adalok aser iba lendong nung US mitkar 7 yirua liasü.
Kandahar province nung mitkartem aliba tesem ka Taliban teloki May ita amakdang Afghan mitkar 15 asü.