Taliban teloki Afghan police trok tepset

Kandahar, December 22 (Agencies): Hokulbarnü suicide bomber kati Humvee gari ka sünga bomb inoker Afghanistan nung police headquarter kati anir ia pokdaktsüba lendong nung police trok taküm sama aser pezü yiru, ta ketdangser osang ajanga ashi.
Kandahar province kübok southern tsütsü aliba Maiwand district nung züngia lia lendong agütsüba ya Taliban teloki tenüng agiogo.
Iba lendong nung nisung trok tepset aser pezü yiru, ta Kandahar police indang odongtar, Ghorzang Afridi-i ashi.
“Iba lendong nung asür ajunga ya iba tesem nung aliba police tem dang lir,” ta Afridi-i osangbener dang ashi.
“Bomb apokba ola ya kanga tesashi liasü, aser headquarter nungi mile aika orr aliba tesemtem nungia angashi,” ta police ketdangser kati ashi.
Iba police ketdangseri ashiba agi, iba lendong nung asür ya nisung ti lir aser nisung toku yiru, , saka pa tenüng memetetdaktsü.
“Police ti tepsetertem ya ki teraksa nungi agitetogo aser anu police kar mangur,” ta pai shisem.
Afghanistan nung küm 16 tashi telungpur temi lendong balala agüja aruba tali tuluba kümdaktsütsü mechi Taliban teloki mitkartem aliba tesem nung lendong balala agüja aser raradang amshiba osettem rakzüka arudagi.
Telungpurtemi Humvee aser pickup gari aika auyaogo, ta ketdangsertemi ashi.
Item garitem ya karbo police aser mitkartem aliba tesem nung lendong agütsüdang amshir.
NATO mitkartemi 2014 küm Afghanistan toktsür aoba sülen nisung tepsetba timba akümer, ta US-i ashir.
Telungpurtem ya kar Afghan mitkartem den tesendaktep yur Taliban nem parnok indang raraba nok-o-nü ayoker, ta itangiter osang kar ajanga sangdonga lir.