Taliban teloki NATO tesep amak; 4 tepset, 18 shi yirutsü

Afghanistan yimtiba, Kabul anüdoklentip tsütsü, NATO-i tesep tentetdak, Bagram Airfield nung bomb lendong ka atalokba sülen Afghan National Army (ANA) mitkartemi tayimtsü anendak kimalen par duty nokdakba noksa nung angur. (Kabul, November 12)

Kabul, November 12 (Agencies): Ayangar ka ama sobur Taliban telungpur kati pa temang nung alenokba bomb podakja, Afghanistan yimtiba, Kabul anüdoklentip tsütsülen tentetba North Atlantic Treaty Organization (NATO) tesep nung lendong tesashi ka tanü, Honibar nü atalokdaktsüogo.
“Peisasa pokseta asütsütsü mulungteter Taliban telungpur kati Bagram Airfield nung bomb lendong ka tanü atalokdaktsüba sülen nisung 4 poksetba aser nisung 18 shi yiruba osang tang tashi nung jangjaogo,” ta NATO-i aniba Resolute Support mission otongdar kati metetdaktsü.
“Tanü lendong atalokdaktsüsangi anogoshia ayanga senzür ka ama sobur NATO tesep nung ayangertem den aroki nokdaker tanü lendongji atalokdaktsüba osang jangjaogo,” ta Parwan provincial governor’er otongdar, Waheed Sediqqi-ia metetdaktsü.
Tanü lendongji par züngsemi atalokdaktsü ta shia, Taliban telokia tanü lendong atalokdaktsüba atema tenüng agia metetdaktsüogo.
“Ozü teloki taoba ita 4 tashi terenemshiba agiba sülen tanü Kabul anüdoklentip tsütsülen bomb lendong tesashi ka atalokdaktsüogo,” ta Taliban otongdar, Zabihullah Mujahid-i osang jangjashitsü.