Taliban teloki Pakistan Air Force tesep amak; 17 shi tepset

Pakistan mitkartemi Taliban tepungpurtemi yirutsüba külem mitkar züngsem ka Peshawar hospital tonga anir aoba noksa nung angur. (Islamabad, September 18)

Islamabad, September 18 (Agencies): Taliban telungpur telok kati Pakistan northwest tsütsülen tentetba Air Force tesep amakba osang ka Pakistan miktar otongdar, Major-General Asim Bajaw-i tanü Hokolbar nü metetdaktsüogo.

“Taliban telungpurtemi Peshawar yimti anasa tentetba Badhaber air force tesep tanep amak saka ozü mitkartemi amaker 13 prongla kaseta iba amakba maparenji nokdangogo,” ta pai ashi.

Tanep amaker telungpur 13-ji mezüngoki ajak agi nisung 17 asüba aser mitkar züngsem 10 shi yiruba osang tashi nung jangjaogo ta pai shisem.

Mitkar sübotsü agiba telungpurtemi telok ana küma lemsar mitkartem tesep telungi aiba sülen telok kati tesep telung nung tentetba mosque nung sarasadem mapang agia alirtem amak aser parnoki nisung 16 tashi kaset ta Bajaw-i osang jangjashitsü.

Tanabuba telokia mitkar züngsem ka kasetba osang jangjaogo.

Tanep lendongji atalokba sülen Pakistan mitkar lenisang, General Raheel Sharif-ia lendong atalokdakji semdanga Taliban telungpurtem nokdanga tongpang raraba mitkar züngsemtem den tsüngdong ajurua liasü.

Ano külen, peisasa pokseta asütsütsü mulungteter nisung 13 tashi air force tesepji amaktsü yokba video ka email asüba sülen, tanep lendongji par züngsemtemi atalokdaktsü ta shia, tenep lendong atalokdaktsüba atema tenüng agiba olen ka Pakistan nung tentetba Taliban telok otongdar, Mohammad Khurasani-i tanü metetadaktsüogo.

Pakistan nung Islam tamangba yimsü kanga sashia benshidaktsütsü aser Pakistan mitkartemi Pakistan northwest tsütsü Afghanistan arrtsülen tentetba teseptem amakba kepzüktsü nükjidong nung Pakistani Taliban teloki tan amala amakba lendong Pakistan nung mapang shia atalokdaktsüba osang bushiteta lir.