Tamajungba arutsü imlar

Yaküm 2020 küm tamasa Covid-19 tashidak agi asen lima tonga arudang, tashidak mena tsübuba agi asenoki asen chirnur aser kinungertem dena bendanglen nungi marudaktsünüi liasü aser aruyonga parnok den ajuruteptsübaji kanga tetsübutsüka liasü. Iba jagi asen nisungsa asüyonga bendanglen alir pei lima bushia arudang, temeimtsüka, kinunger shinga parnok den ajurutepi mao aser parnok shinga indangindanga pei kidangi moudaktsüi quarantine asüdak tesem balalai government-i bener senshi. Ano, asenok tali tsübudaktsüba agi, pei mepu aser kiyong nung quarantine center lapokdaktsünera mali asü. Item ajakji tashidak memenatsü asoshi onsara tsübuadokba agi, onsara talika kümdangba mapatem liasü. Iba tensa tia denji tang ya medemdangra, tangbo quarantine center mayur aser Covid putetyonga meshirangra mozü kidang masü, pei kidangang kinungertem den memeyoktepi mongdaktsür. Atangji, tanga asenoki Covid tashidak ya kanga tsübur, saka tsübuba agi kinunger agi kinunger masü akümtsüsabo masü, tangbo akok tashi kidanga aser mozü kidanga anepaluteper. Aji oda, tangbo Covid putetaka meshirangertembo kidang ayubaji dang masü saka Covid Hospital nunga Covid agi shirangertem nüngdak repranga anüktsü asoshi kinunger nisung kabo alitsü melar. Iba amaji yaküm nungi tanem tanemi melinüseti Covid wara den ali tenzükogo. Ano, tang ya kasa tashidak wara indang mongintemi jembibatem angadangra, Covid-19 wara ya tanener masü saka August ita ama ka nungibo tamajungba aser tesashiba tashidak mopong arutsü indang jembiba angashir. Iba jagi, pibo ano Covid-19 tashidak wara ya tesashiba arura ta bilema, kija shia ajem agir, kibong shia pei nüngdak bushitepa ayur aser government, lokti aser arogotemi shirangertem yaritsü asoshi kiojen, osettsüset aser mozü shitak renema atatsü sentong balala yanglua inyakteper. Tetezü, alima nung kin ajak tang ya yipru tesashi aittsü meteta kiojen akangshia yanglushi ama, Covid wara mopong tesashiba arutsü ta bilema renemtepba mapang ka lir. Iba renemtepba sentong nung teinyaktsü tongtibang anaji ka, nisung ajak covid mozü jem agitsüla aser ano kaji, government-i mozü kidang nisung, oset aser mozü ajak shitak yua atatsüla. Aji oda, nisung ajak mokdanga yur yamai kümdangshimonga, kechiba ano kasa wara mopong tesashiba-ang arutsü imlar ta süra, tashidak aliyonga alima ka, küm junga mokdanger melitettsü, anungji tang state shia nung tanem tanemi pei pei mapang nung nübortem mokdanga akaba chiokba asenoki angur. Asenoka yamaji tanemi tanemi akhi ama mapa sadema inyaktettsüsa chioktsü. Idangji, nisung teimbaka Covid mozü jem magi ser senzüra, parnok dakji tashidak wara melamelaa atemtsü aser ayimsünga prokshitsü. Iba ama mapang ka nungji tesem ajaklen shiranger züintsü aser mozü kidang yipten agi makutsü, anungji shiranger aika pei kidang pei kinungertemi anepalutsüsa akümtsü. Idangjibo, shiranger anasai tou asüyonga, anasai aobaji dang masü saka kongshia anepalutsüsa akümtsü. Iba ama mapang nung Covid jem magirtem temelaba tashidak menatsü aser shirangertem rongnunga mozü jem agia alirtem tama aneptsü. Aji oda, tangarbo iba ama tang dang nungi tamajungba mapang ka arutsü ta shisabolua bilemba agi, tamajungba anogotem asoshiji mozü jem agia renemteper. Nisung shingaia iba tashidak wara ya pei dakbo matongtsü aser meshirangtsü ta mebilemtsüla. Iba tashidak yagibo mozü kidang inyakertem dena shiranger aser tanga lima nungbo aika süogo. Aji oda, joko aruadoker asünungji, Covid wara ya kentenjikabo asenok den alitsü, anungji ashir auer alidak kümdanga aliba amato, wara tesashi den alir asünungji mapai aodanga maodanga asensasa asen kanga kümdanga alitsübaji kanga tongtibang kümogo. Tashidakbo tsübur, ajembo magi ser kidang kidang dang among nung, Covid jagi ki tashijia asen bushia arutsü, anungji asenok terenemtsüka tashi renemerbo, asenoka pei teinyaktsü kabo, joko, arakzüka inyak tenzüktsüla.