Tamakok anguba sülen Bihar HAM Tir-i menden toktsüogo

Patna, November 13 (Agencies): Bihar assembly election nung tamakok kanga mejungi anguba sülen BJP den teloktep party, Hindustani Awam Morcha (HAM) Bihar state Tir, Shakuni Chaudhary-i pa menden toktsüogo.

Tanü Patna nung osangbenertem senden ka nung Chaudhary-i, “Ni yimtenren mapa toktsür,” ta sangdong.

“Ni jangraba ajak tongtetogo, ibayongji nüburtemi shimba yimtenren ni toktsür,” ta Chaudhary-i ashi.

HAM ya taoba Bihar Chief Minister, Jitan Ram Manjhi-i tentetba party lir.

Chaudhary-i Munger, Tarapur menden nungi toktep saka pai vote 12,000 ajanga JD(U) candidate Mewalal Chaudhary matsüngdang tamakok angu, aser par jabaso Rajesh Kumar-a Khagaria menden nungi JD(U) MLA Poonam Devi Yadav matsüngdang tamakok angu.

HAM ya NDA teloktep nung tongtibang party ka lir, ajisüaka Bihar election nung tamakok nguogo. HAM-i menden 21 nungi toktep saka menden ka nung dang takok angu. HAM tongti lenir, Ram Manjhi-i Imamganj (reserved) menden nungi takok angu.

Shakuni Chaudhary army nung küm 15 tenzükba sülen yimtenren nung mapang talangka liogo. Pai 1980 küm mezüng election nung takok ngua tenetben tashi MLA inyakogo aser Khagaria nungi MP khen inyakogo. RJD sorkar mapang nungbo pa minister-a inyakogo.

Mapang talangka Chaudhary-i RJD tongti, Lalu aser JD(U) lenir, Nitish Kumar na den külemi inyaksemogo. Lalu aser Kumar leniba nung Bihar terenlok lenmangi anitsü tamang akar, ta pai shiogo.