Tamakokji teti atema masü, party tangatetba nungi mepilatsü: Sonia

New Delhi, May 21, 2016: Taoba mapang Ato kilonser, Rajiv Gandhi sür küm 25 ajungba anogomung nung May 21, 2016 nü New Delhi nung aliba Rajiv Gandhi memorial ‘Vor Bhumi’ nung asür kinüngtsü aser Congress Party Tir, Sonia Gandhi aser Congress tatong Tir, Rahul Gandhi nati asür nem naro agüja akhüm agutsüba noksa nung angur.

New Delhi, May 21 (Agencies): State pongu nung state assembly election nung Congress-i tamakok anguba sülen tanü Congress Tir, Sonia Gandhi-i party nung inyakertem dang, “Tamakokji teti atema masü, anungji party tangatetba nungi mepilatsüla,” ta ashi.
Taoba mapang Ato kilonser aser Sonia Gandhi kinüngbu, Rajiv Gandhi sür küm 25 ajungba anogomung nung Youth Congress-i ayongba senden nung jembidang lai, “Pei tangatetba toktsür takok angubaji mapang talangka atema masütsü. Tangatetba nungi mepilara tamakokji teti atema masü,” ta ashi.
Tawa tembangba assembly election nung Congress-i Assam, Kerala, West Bengal aser Tamil Nadu state tem nung tamakok nguogo.
Lokti balala tsüngda tesünep nung alitsü tayongzükba agüja lai, “India li nung Rajiv azü tsükba temenok atema asenoki lokti nung tesünep ajungketja tashi itdadaktsütsüla,” ta ashi.
“Pai tongmelang taküm aliba, tesünep aser amalitep atema inyakba tsüngsü nung asenok anidaktsüla. Ibaji pa nem chichia akhüm agütsüba asütsü. Ibaji ajanga dang asenoki Rajiv asenok den lir ta shitettsü,” ta laisa ashi.
Taoba ato kilonser Rajiv-i lanurtem nem temeten balala agütsüba tenüngsanga lai, linük terenlok atema pai tajemzük tia nung alir lanurtem nem shilem agidaktsü, ta ashi.
“Pai agiba meratem ajanga alima nung India-i nüma tangteter,” ta lai ashi.
“Science aser technology ajanga sensakertem taküm nung azükaru alitsü atema asentenshi mera agisangji pa lir. Assam, Mizoram aser Darjeeling nung yimjung alitsü atema inyaksangji pa lir. Rajiv-i India ji alima linüktem rongnung temalen aginüa liasü,” ta Congress lenirisa ashi.
Congress tatong Tir, Rahul Gandhi anogo ishika tema manemi lir, iba den külemi taoba Ato kilonser, Manmohan Singh na iba sentong nung medentet. Taoba mapang Union minister  P Chidambaram aser A K Antony nata iba sentong nung dena liasü.
Kasa sentong nung Congress lenirtem- Ghulam Nabi Azad, Digvijaya Singh, Janardan Dwivedi aser Ajit Jogi nungera dena liasü.