Tamalen Patkai nung azüngertemi campus nung lenmang yanglutsütsü

Caption : August 16, 2017 nü Patkai Christian College, Dimapur nung Road project foundation azüngtsüba sentong nung Principal Emeritus, Rev. Dr. Tuisem A. Shishak (nokdaka alir tabelen nungi tasembuba) aser Principal Husazu Epao (nokdaka alir abelen nungi pongubaba) na den akhidang iba college nung azüngertem tangokba noksa nung angur.

 Dimapur, August 16 (TYO): Tamalen Patkai nung azüngertem, Alumni Association of Patkai Christian College-i college campus nung gari lenmang yanglushitsütsü atema project ka tenzükogo.

Tanü College tongti süngküm nung gari lenmang project atema lung azüngtsüba sentong agiogo, aser Principal Emeritus Rev. Dr. Tuisem A. Shishak-i iba project tenzükja liasü.

Alumni association-i iba campus nung kilometer 1.4 lenmangji ‘bitumen’ agi masü saka longro waitepa (interlocking bricks) yanglutsüner.

Sen lakh 85 project ya yaküm nungi ketdangsüa tenzük saka taküm ang sentong renemogo aser anogo ishika tsüngda iba mapa tenzüktsü.

Iba sentong nung jembidang Rev. Shishak-i alumni association-i iba ama mapa tajung ayonga inyakba atema pelaba metetdaktsü, iba den külemi iba project atema sarasademtsütsü aser nungittsü ayongzüka liasü.

Iba college nung tamalen azünger aser Examination Controller, Neilevono Vupru-i, “Gari lenmang ajanga tesem tia sayur, anungji ongken maliba lenmang nüngdaker,” ta ashi.

“Nisung kari danga anibelem mapa tali meinyakra item ama sentong ya takok mangutsü. Iba project inyaktsüji tezüba masütsü,” ta laisa ashi.

Ajisüaka Vupru-i, iba college nung tamalen azünger nisung 5,000 dak tema lir aser ajak jagi pei jenjang apir tenla agütsüra iba project ya takok angutsü. Asenoki meranga inyakdi, aser lenmang tajungji atangji nung yanglutettsü, ta ayongzük.

Ano külen association-i tamalen college nung azüngertem dang senotsü aser osettsüset tenla agütsütsü ajungshi. Iba den külemi tongteprateptsü atema contact number,  Shonreichon Sareo @ 8258997774 asr Apam Jagoi @ 8731852516 agütsü.