Tamang aser sayatenya

Atangji asenoki anüng ali aser asenok yanglusang Tsüngrem ka lir ta meteta lir. Iba Tsüngremji tetsübutsüka Pai tesüngmangtsü sayatenya mapa inyaker ta asenoki meteta lir. Ajisüaka, asenok dak tashimait kaji asenoki asenok tenük agi sayatenya inyaka mengura asenoki Tsüngrem dak mamanger. Aji oda, Tsüngrem dak amangtsübaji Pai asenok dang sayatenya mapa inyaka sayu nung dang amangtsüba tamangertemji asenok lir. Ibayongji, asenoki Tsüngrem lir ta metetaka aiben junga mamangteter. Aji oda, asenok kodamasüba mapang nung Tsüngrem dak amangtsü asoshi asenoki sayatenya nüngdaka meshir. Tetezü Tsüngremi sayatenya ka inyaka  mesayura, asenoki Pa dak mamangtsü. Atangji, asen Tsüngremji sayatenya Tsüngrem, Pai sayatenya mapa inyaker, ajisüaka Pa dak masü saka Pai inyakba sayatenya nung amangertemji Tsüngrem dak amangertem masü. Parnokji Tsüngrem tsüngdang onsara tia majungertem lir. Tsüngrem lir ta metetba aser Tsüngrem dak amangba na ya tetsüngda talangka lir. Lir ta metetyonga nai mamangra amajok. Lir ta metetba kija nung khuret mali, anungji mapa maden, saka lir ta amangba nungbo mapa aser khuret dena lir. Iba jagi Yakobi ashir, Tsüngrem lir ta amangaka mapa medenra, asenok tamangji tasü den kasa lir. Asenok lendong nung alidang, asenok makamait tongpang den raradang aser asenok shirangdang, asenoki Tsüngrem dak amangtsü asoshi sayatenya meshir. Asenokibo Tsüngrem dak jungjungabo mangmangteter saka kodang nüngdak adoker asen taküm aser kibong nungbo Tsüngrem lir ta jangjatsü atema sayatenya mapa inyakdaktsüner. Ajisüaka, Tsüngrem dang sayatenya mapa ka inyaktsü asüngdangba jagi asenoki pa dak mangmangba temaitsü sayur. Sayatenya ka mesayu tashi asenoki sentepi maor, sarasadem masür, machimajemtsü chia ajemba nungi manener aser tashi manger, saka Yisui ashir, item sayatenya aginer atema Yona dang sayuba sayatenya dak alaka kecha mali. Mathi 16:4 nung ashir, ” Tamajung aser nüktapangta putui temaitsü bushir, saka Yona temaitsü dak alema parnok nem kecha temaitsü magütsütsü.” Asenok Tsüngrem dak amangertemi angatettsüba tongtibang kaji Pa dak amangba ajanga sayatenya ataloker saka sayatenya ajanga pa dak amangba tamangjibo, ashiko lisem nung ki asüba amato asütsüa akok. Nebukednezzar chuba mapang, kodang pai Shadrach,Meshach aser Abednego nungertem mi ongken nung enoktsütsü asoshi ozüng agütsü, par asemi Tsüngrem dang sayatenya nung kümzükang ta memepishi aser mayimten, saka Tsüngremi parnok mi ongken nung jagi kümzüktsü ta parnoki amang. Ashiko, asenok asübo chubai mi ongken nung enoktsütsü ozüng magütsü dang yongi, Tsüngrem nai onok taküm nü sayatenya nung kümzükang ta lumia sarasademtsü tenzükla. Ajisüaka, Shadrach, Meshach aser Abednego nungertemibo Nebukednezzar dang ashi, ” Oh chuba, ozü Tsüngrem shiba dang onoki tenzüker, Pai onok milak adoka aliba misem nungi onok kümzüktsü koka lir, aser Pai onok nü ket nungi kümzüktsü. Saka aji oda mesüaka, oh chuba, nai ya metetang, onoki nü tsüngremtem metenzüktsü mesüra nai yangluba hon süngyanglu onoki mekülemtsü.”(Daneil 3:17-18).  Tsüngremi parnok kümzüktsü ta par asemi kanga akanga amang aser ano iba dang nungi tuluba tamangji, par asemji mi ongken nung jagi mekümzükyonga, par asemi Nebukednezzar dang taochi sayutsü memepishi. ” Onok mi ongken nung jagi onoki amangba Tsüngremi mekümzükyonga, onoki nü tsüngremtembosa metenzüktsü,” ta Tsüngrem dak amanga chuba dang shitetba tamangji tulu aser tenükshitsüka lir. Tsüngremi ibaji aginer. Tanü asenok ama Tsüngrem dak amangertem asoshia asenok lendong aser timtem mapang nung sayatenya dak masü Tsüngrem dak süksüka amangtsübaji kanga tongtibang asütsü. Ibai sayatenya agi masü saka tamang agi aliba putu lir.