Tamang Ken – (T. Ken 98: 1-9)

Seminary ka nung professor ka küm aika Africa nung missionary mapa inyaka liasü. Kodang pa mezüngbuba Africa atong pai ayongküm nung nüngnüngba aser asem atemba angashia liasü. Saka pa küm 25 missionary inyaker, pa kodang kidangi ao pai ayongküm nungji telok atenshi, “Ajaki Yisu külemang, tenyartemia külemang” ta atenba angashi. Koda tepelatsü !
Khristan tamangji ken tenba tamang ka lir. Khristantemji ken tenba telok asütsüla. Laishiba nung asenok dang Kibuba dang ken atentsü ajungshir. “O Kibuba dang ken tasen ka tendakjang; kechiaser Pai sayatenya mapa inyakogo, pa teka tajichi aser pa temeshi teka agi pa asoshi takok nguogo” (t.1).
Tsüngrem takokba asoshi ken tenang. Nai ne taküm nung takok mangu ta bilemra, Kibuba takok asoshi ken atentsü tenzükang, aser Pai na asoshi kechi inyaktsü iba nung na süngmangtsü.
Pa tekümtet asoshi ken tenang. “Kibubai pa tekümtet metetdaktsüogo: kintem nükdang Pai pa tekümtet jungkai adoka sayuogo” (t.2). Tanü asenoki nübur dang pa tekümtet osang sangdongtsüla.
Pa taochi aser mulung lemtet asoshi ken tenang. “Israel kin asoshi pai pei temeim taochi aser pa mulung lemtet bilemtetogo: aser Tsüngrem takokba alima tatem ajaki nguogo” (t.3). Kibuba taochi asenok den dena liasü, aser Pa mulung lemtet putu ajak nung alitsü.
Pa arutsü indang ken tenang. Tekong 9 nung Kibuba tsüngdang tenemtem pelateper ta ashir, “kechiaser Pai alima o bendangtsü arur; alima temeshiba agi aser nüburtemji ochi agi o bendangtsü.” Pa arutsü indang ken tenang, kechiaser Yisu tanü meyipa arutsü akok.
Nai ne taküm asoshi Tsüngrem tushia ken atener asü? Nai ne ken samar lira, tetezü na langka samaogo- na Tsüngrem mangdang, Pa o nung tamang- mesüra ne taküm dangi temenen aita lir. Iba ken nung ashiba ama anidakang aser “Kibuba dang ken tasen ka tenang.”