Tamang mapa (Mathi 25:31-46)

“Item kü adianu tilatiba rong nung ka danga nenoki kechi inyak, aji nenoki kü dang inyak.”  (Mt. 25:10)
Kechiba pa molumi ao ? Luke 16 takar nisung temenenji pai meinyak. Pai Lazar tim kecha nunga meyari. Pai par kishizüng nung shiba ondaka liasü pa chiyongtsü aser jenokdak akhüm magütsü. Kechiba chubai abelen alirtem mipung nung teti asoshi inoktsü? Parnoki teyari mapa meinyakba temenen ajanga parnoki teti tatem maka temerenshi bena aru (Mt. 25:41-46). Galatia 2:10 nung sensakertem bilemtsü tenyartemi sayu saka tanü arogo sensakertem asoshi mejembir mesüra tera dang jembir. Sensaker indang bilemtetba jagi tatem maka alizüng atema lemtetter. Tesayurtemi school aser collegetem nung students dang temeim mapa inyaktsü indang sayutsüla.
Lisem lima nung shiba temulung meyiptsü indang sayutsüngi, pa dang angaa alirtem dang pai ajungshi, “Shiba tola ana aka pai makaba nem ka agüjang, aser shiba chiyongtsü aka pai kasaji inyakang” (Lk. 3:10,11). Tamang aser mapa tenyari tajungtiba temerük yimsü tetezü agütsü (Yakob 7:27). Mapa meteni tamang jagi shinga mekümzüktsü ta sangtong (Yakob 2:14-16). Tagütsüba meteni salem agütsübaji mapa matenba tamang lir. Tsüngremji sensaker Tsüngrem ta Laishibai lepshia ashir. Dawidi pa dang “Tebu malirtem teyarir” ta aja (T.Ken 10:14). “Tebu malirtem Tebu” “aser amitsürtem kümdangang” (T.Ken 68:5). Asenoki Pa jakla ajizüker asü masü?
Isaiai Tsüngremi shimtetba telumiba indang ashibaji reprangang: “Iba ama lumiba ni shimtetba asü? Nisung asoshi pei tanela timtemdaktsütsü anogo no? Ibaji pei tekolak ayi ama mechizüka alua, aser pa anemsü aser aut agi lungbanger senzütsüba no? Iba dang Kibuba anogo ta nai ajatsü asü? Ni shimtetba telumiba jagi tamajung talenba salatsü, süngra talentepa salatsü, aser rishikangshir nüji kümdaktsütsü, ya masü no?” (Isa. 58:5,6). “Shibaisa sensaker dang tiludir pai Teyangluba sensamaseri aser lendong madak pelarji memerenshii malitsü” (A.S. 17:5). Yobi temeshiba mapa agi sayu (Yob 29:11-17). Pa philosophyji “Kechiba teka aketeri meyaritsü?” (Yob 31:16-22). Mother Teresa philosophy: “Khristan yimsüji Temeim.”
Külemi aliba jagi, ajak dang tajung inyaker, Yisu tenüng nung alanga alirtem mesuang; sensaker aser tembar malir dang teka salaang- Ibai asenok mapa, ibai Kibubar tenyaba!
(Fanny J. Crosby, 1820-1915).