Tamang Tetsüng – Ibri 11:8

Asenoki nisung kar dak temulung toka lira pai/lai ashibaji asenoki mela-mela inyaktsür. Ibri kaket nung Abrahami iba ochi tatishitsü sayuba angur. “Tamang ajanga Abrahami tashi anga” (Ibri 11:8). Pai Tsüngrem dang “tembar” ka ama amang. “Pa dang Tsüngremi tembar ta aja” (Yakob 2:23). Tsüngremji Tebu ta atema dang masü saka Paji tembar ka ta sayutsü Yisu aru. Tashi angaba ajanga kibong nung tanur aser tsürabur tembar ama jangratema alir. Yisu alima aliba mapang Pai temenen pur aser temeshipur ajak den tembar küma liasü. Pa dang “Temenen purtem tembar” ta tenüng agütsü aser Pai Pa nütsüngtem dang tembartem ta aja. Amangtsü aser temulung lema alitsü asoshi tembar akümtsübaji kimong lir.
Tsüngremer ozüngtem asenok dangi Pa otem ajanga arur. Asenok item O nung mamang tashi angatsü makok. Adami tashi manga kechi Tsüngremi tajung aser tamajung metetba süngdong indang Pa dang ashiba Pai mamang. Mamangba agi Israel nungeri Tsüngrem dang tashi manga (Ibri 3:18,19). Tanü theology melen technology adokba putu ka nung Tsüngrem dak amangba tamang ayutsübaji temüla masü. Sayutsüngiba ren asertesayubaren ajak technology tsütsüi atsür odaktsür.
Tsüngremi itemji maitsür. Shidak inyaktsü itemji tenüngdaktsü. Saka ajak Tsüngrem O koba memelenshir alir iba O-i ashiba ama alitsüla. Peter aonung tepiyong ango bushir kecha mapu, teyimla samar liasü.
Yisu ango pur masü saka sung mapa inyaker ka liasü. Kodang Pai Peter dang zütsük tzü tarok nung aotsü ashi, Peter asoshi ibai amangtsü tasak liasü. Saka kodang Pai ango apuba temetetba Yisu O nung ayu, pa asoshi tashi angatsü temüla aküm. Pai ashi, “Aji oda süaka nai ashiba ama ….” (Lk. 5:5).
Iba ama tamang Tsüngrem O maneni angashiba ajanga arur. Azüngba kisüng nung masü, saka angashiba ajanga tetezü azüngba shiaji Tsüngremi jembir ta angatetba. Angashiba jagi amangdaktsür aser amangba jagi tashi angaba nung yarir (Rom 10:16,17).
Mamangba ajanga temulung merangdaktsüra tashi angatsü tasak kümdaktsür. Ibri kaket züluri asenok nem tekümdangtsü agütsür, “Adianutem, taküm Tsüngrem nungi tsüktsüsa nenok kar dak mamangba temulungjang malitsü kümdangang” (Ibri 3:12). Kodang asenoki asenok dang ajasangji “taküm Tsüngrem” ta angatetter, tanur ka pei tetsü teku nung temulung lema ajungba ama bilemtsü. Shisabulu mali. Tebilemtsü mali.
Shiba Tsüngrem dang tashi angar, Tsüngrem dak amanger; aser shiba Tsüngrem dang tashi anger pai Tsüngrem dak amanger (C.H. Spurgeon 1834-1892).