Tamangba lenirtemi putu tasen India atema inyaktsüla: Modi

Gorakhpur, July 22 (Agencies): Putusen India ka aser azükaruba linük ka atema tamangba loktitem aser tamangba tesayurtemi tongtibang shilem ka agitettsü, ta Hokolbarnü Ato kilonser, Narendra Modi-i ashi.
Tamangba lokti aikati lokti metsümeshidak yanglutsüba aser nüburtem anema alitsü atema inyakba densema lokti ajungtsü atema mapa tajung aika inyakdar, ta Modi-isa metetdaktsü.
Yangi Hindutva lenir, Mahanth Avaidyanath indang kürakyanglu sayatsüba sentong nung jembidang Modi-i, “Tang nüngdakbaji- tamangba loktitem aser tesayurtem lakh aikati putusen aser azükaruba India ka akümtsü atema tongtibang shilem agitsüla aser nüburtem dang tesayuba tajung agütsütsüla,” ta ashi.
“Aikati ibaji inyakdar. Linük tarutsü tua atema ibaji junger,” ta paisa ashi.
Iba sentong nung Gorakhpur nungi BJP MP, Yogi Adityanath-a dena liasü.
Asür, Mahanth Avaidyanath ya pezüben tashi BJP MP liasü aser Ayodhya nung Ram tekülem ki yanglutsü atema inyaker rongnung walunir ka liasü.
Pa 2014 küm asüba sülen yaküm pa asoba anogomung nung sorkari pa nüngtem nung stamp ka sayaja liasü.
Sangküm Uttar Pradesh nung assembly election agitsü lia Ato kilonser, Modi-i yangi terenlok project aika tenzüktsüdar.
Linük nung mapang-mapang shia mapang shitak nung temelenshiba kadar, ta shia Modi-i, tanü-asüngbo tamangba tesayur aikati merükmejuba mapatem, lokti metsümeshidak yangluba, tenük operation agiba centre tem lapoka nüburtem tenzükdar, ta metetdaktsü.
Avaidyanath-i lokti ajungtsü atema inyak, aser item mapaji Adityanathi melenzüka maneni inyakdar, ta paisa ashi.
Mahanth indang kürakyangluji Gorakhnath tekülem kidang lir. Iba tekülem kidang Avaidyanath ya tongti putir liasü aser Adityanath-i pa melenzüka tang tongti putir inyaker.
“Ni yimtenren nung majemokdang yongi Mahant Avaidyanath den inyaksema liasü. Yangi inyakba mapatem indang osang ni pa dang nungi angazüka liasü,” ta Modi-i twitter ajanga ashi.
Kasa sentong nung Uttar Pradesh Angh, Ram Naik aser Parliamentary Affairs Minister, Ananth Kumar nata liasü.