Tamangba lokti tsüngda rara adokdaktsüba tetsüji BJP lir: Cong

New Delhi, October 17 (Agencies): Yashi BRICS senden nung Ato kilonser, Narendra Modi-i, alima nung kiralongraba tetsüdiji Pakistan linük lir ta aitsüba sülen tanü Congress Party-i BJP aija, “India nung tamangba lokti tsüngda rara adokdaktsüba tetsüdiji BJP lir,” ta aitsü.
Congress lenir tain, Kapil Sibal-i twitter ajanga, “Kiralongraba tetsüji Pakistan lir’. BJP ji tamangba lokti tsüngda rara adokdaktsüba tetsü lir. UP yimtenren nung nung telemsa atema Love jihad, nashishi politics aser tamangba yimsü meyipdaktsüba meratem agir,” ta ashi.
Sibal-i Ato kilonser Modi-i Pakistan anema jembiba aser UP assembly elections na sentaktepa jembiba o meyipja BJP otongdar, GVL Narasimha Rao-i, “Pakistan aitsü shia Congress-i kümzüker,” ta ashi.
“Independence Day onük jembidang Ato kilonseri Balochistan tetshidang, Congress lenir Salman Khurshid-i tama ibaji aitsü,” ta BJP lenir Rao-i news channel ka dang ashi.
Paisa, Congress-i inyakbatemji linük anema asü masüar linük nüburtemi bendangtsüla, ta shisem.
Rao-isa, Sanjay Nirupam aser Digvijaya Singh ama Congress lenirtemi tashishitsü o aketba jembiba indang aitsü.
Yashi BRICS senden nung Ato kilonser, Modi-i, alima nung kiralongraba ajak nungji Pakistan sentaktepa lir, ta ashiba den külemi alima linüktemi mera takang agia kiralongra anema raratsüla, ta ayongzüka liasü.