Tamangba yimsü agi senso mekümtet

India lima ya Hindu yimsü dak amangertem kanga agia teimba ser aliba lima ka lir, ajisüaka tanga yimsü dak amangertem asoshi tajung kaji India lima ya Hindu lima masü. Tetezü India temzüng agi India lima nung tamangba yimsü ajak sademsadema amangtsü aser proktsü temeten agüja lir. Ibayongji India dang ya tapu aika alidak telongjem lima (Unity in Diveristy) ta ajar. Tetezü, alima nung aliba aser benshiba  sobaliba, kin kidong, oshioben aser tamangba yimsü ajak India nung lir, saka kati ka den metsükchitepi putepa otetter. India topur ajungbaji tenem aser ayongtem kija agi agi masü saka iba jagi topur jungdaktsür. Ajisüaka, tzüim süngjema alidang yipru agi nungshitsüba ama, khen khen tamangba yimsü kati ka anema apusodang linük nung lendong timtem aser takoksa jenti ajurur. Ibaji meteta tang center nung yimsü tesüdak BJP teloki aniba NDA government-i inyak nung ajungtsüba ser nung aiben Hindu yimsü tsütsü atsünga inyakba mapatem reprangtetter. Item mapatem rongnung kaji tang linük ajaklen Citenzenship Amendment Bill (CAB) tatar senden nung benoka temzüng ozüng akümtsü merangba mapa ya asütsü. Atangji, CAB latettsüba nükjidong jagi Hindu nunger dang masü saka Muslim nungertem  daka alaka Khristan, Sikh, Budhists, Jains aser Parsis yimsü dak amangertem dena lir. Item tamangba yimsü amangertem, shirnok Pakistan, Afghanistan aser Bangladesh nung reshikangshi marem India nung aruagi 2014 küm December 31 tashi nung jenoka lir, parnok ajak nemji India senso agütsünüba agi linük nung tang lateta akaba Citizenship temzüng ozüng ya melenshinür. Ibaji tangatsübo tajung saka tamangba yimsü tenüng nung kodang yimten kati senso agütsüdir, iba jagi iba linükji sünepa melitettsü aser anogo lateta yutsübaji yazü akümtsü. Ano ajaki meteta aliba kaji, Pakistan. Afghanistan aser Bangladesh nung pei amangba tamangba yimsü ajanga melitettsüsa kümer India nung jenokertemjibo Hindu nungertem dang asütsü. Senso ka asoshi temetentem rongnung senso temeten yasa tuluba aser tematiba lir. Ibayongji senso temeten indang jembidang aiben asenok rongnung tang amai meputep adoker, kechiyong ajaki senso temeten aginür saka shitakba sensosangertemi bendangertem nem tapi agibo senso temeten magütsüner. Tang India nung BJP teloki aniba center government-i tatar hoho nung benoktsü anendaka aliba CAB ken o kaji bendangertem nem senso temeten agütsütsüba onük lir. Atangji, iba tebilemba onük ya BJP telokibo taküm küm election magidangsa temzüng ozüng küma latetnüa liasü saka, talisa, Northeast nung alirtemi iba tebilemba onükji anema kanga sashia apusoba agi Lok sabha tashi nung jembir, Rajya sabha nung mejembi ayu. Ibaji tang tatar senden nung ya benoka jembitsü terenemba lir. Atangji, taoba election mapang, BJP teloki kanga sashia nokdakba ken o kaji, anosa BJP teloki government kümtetra, CAB onük ya asangsang nung temzüng ozüng küma amshitsü ta yimjak nung jembia jajaba onükji liasü. Iba sülen BJP teloki takok tulu ngua government kümogo. Ano, tesüngmangtsü kaji, CAB onük anema sashia nokdakdak, Northeast state ajak nung BJP teloki takok tajung angu. Iba jagi yimdong nung kar asar dang ashi, shitakba nungbo nübortemi CAB onük ya temzüng ozüng küma latetdaktsüner ta ashitsüsa yimten tensa tia ka nung Northeast odagi. Ajisüaka, BJP teloki metettsüba kaji, Northeast nung nübortem teimbakati BJP telok yaribaji, CAB agizükba tamaitsü masü saka BJP dak alaka tang tangbo tanga telok nem  India madak yimsü mesüdaktsüner, Congress agi alak aser tanga yimten teloktem daka temulung melemtetter ta asüba putu ka nung, tang BJP teloki nübortem dang nungi iba maongkaji agir. Anungji, election result nungji dang metaloker, center government-i tenük amur dang CAB ya temzüng küma latetra, ashiko, Northeast-bo India nungi piladi ta asütsüa akok. Langa lira bendangertem nema senso agütsütsü tim saka tamangba yimsü dak ajemdaker senso agütsütsüba sentongjibo majung aser magizüktettsü.