Tamangba yimsü ajaki temang shilem tenlaba ya mapa tajung ka ta züngshir

Mumbai, August 07 (Agencies): Nisung ka taküm kümzüktsü atema temang shilem tenlaba dak sendakba nung tamangba yimsü nung ajemdaker kibong aikati arendaker, aser iba dak sendakba nung Times of India aser Kokilaben Dhirubhai Ambani Hospital senteper parnoki tamangba yimsü balala nungi lenirtem ayongzüka sentong ka agia liasü.
Ghonda ana shi senden nung, ‘nisung kati sür sülen pei temang shilem/tenüktelen tenlabaji mapa tajung ka lir’ ta ajaki bangjema liasü.
“Tenlaba ya tapu aika lir, saka ajak rongnung tenla tulutibaji pei temang shilem tenlaba ya asütsü,” ta Brahjma Kumaris nungi Rajyogini Kamlesh-i ashi.
“Temang shilem tenlaba nung tamangba tsütsü nungi tsetsüdaktsü mali. Alima rongsen tenlaba nung tamangba yimsü tiyongtsü maitra kechiba temang shilem tenlaba nung tiyongtsü aittsü,” ta lai ashi.
Ramkrishna Math & Mission object nungi Swami Durgananda-i, India nunger atema temang shilem tenlaba ya onük tasen ka masü, kechiyong Indian scriptures nung iba indang ya aiben shia lir, ta ashi.
Ano Khristantemia iba ya mapa tajung ka lir ta bilemer. Moral Theology & patrology Professor, Father Stephen Fernandes-i, “Pope John Paul-II-i, transplant agiba shiaji telemtetba tajung ka agiba dak sendaka lir. Iba mapa tajung ya, nisung ka kümzüktsü atema sempet kecha meimlai pei temang shilem tenlatsü telemtetba agiba ya lir,” ta ashi.
Paisa Khristantem dang, temang shilem nüngdaker ka nem nisung kati tapet temang shilem tenla agütsütsü ayongzük.
Islam yimsü nungi Centre for Peace & Spirituality International züngsem, Maria Khan-i, Quran ajanga nisung taküm ka kümzükbaji meimchirtem kümzükba ama züngshir, ta ashi.
“Temang shilem tenlabaji taküm ka akhümtsübuba ka lir. Anungji iba ya Islam tamangba yimsü nung mapa tajung ka lir,” ta laisa metetdaktsü.