Tamangba yimsü ajaki yi anemer: Nitish

Mumbai, April 23 (Agencies): India linük tesem ajungalen yi nokdangtsü atema lokti ajak longjemtsüla, ta tanü Bihar Chief Minister, Nitish Kumar-i ashi.
“Tamangba yimsü ajaki yi anemer. India tesem ajaklen yi nokdangba ajanga nübur ajak aser tamangba lokti ajak longjemtettsü,” ta Kumar-i ashi.
Janata Dal (United) unit ka Maharashtra nung tenzüktsüba sülen jembidang Kumar-i Maharashtra densema state aikati yimtitem adenba highways nung Supreme Court-i yi nokdangba agientsü atema mepishiba aija liasü.
“Iba nung ya lendong keta lir. Bihar ya yi mamshiba state ka kümogo, ajisüaka saru tsütsü takoksa mangur. Yi ajemba aser ayokba nungi saruji sen crore 5,000 liasü, ajisüaka Bihar ama sensaker state ka nung ni yi alizükba nung nüburtem sen crore 10,000 meindoktsü. Saru ajema akumba mali. Highways nung gari lendong kanga ajema kümogo,” ta paisa ashi.
Yi nokdangba sülen Bihar nung Tourism jenjang tajungba kümogo, ta paisa ashi.
“Goa nung osangkaket ka ajanga ashiba agi, kinüngburtem yi ajemba ajanga tetsür shilem 80 shibo jashi dang aliba osang lir,” ta Kumar-i ashi.
Bihar Chief Minister-isa, par sorkari state nung school azünger tetsürtem nem bicycle angati agütsüba scheme tenzükba ajanga tetsürtem shisaliok nung nüburtem tangatetba melenshiogo, ta ashi.
Aluyimertem tebilemtsü dak sendakba nung Kumar-i, linük nung aluyimertemi timtem ajuruba ajanga Marathas, Patidars mesüra Jats nungeri mapa aser kaket rijutem nung menden wazüka yutsütsü akhanger, ta ashi.