Tamangba yimsü ana tsüngda

Nagaland nung asenok Khristan-tem ya Hindu nunger o Muslim nungertem na tsüngda samatsü amai lendongbang ka nung lir. Asenok Khristan akümba ya onsara tia ajung, kechiyong asenokang asenok menen asoshi sür shia aruba Tsüngrem chir Yisu Khrista dak amangertem lir. Ajisüaka, Khristan asütsüba ya temela masü, kechiyong iba yimsü ya pei linütsü alitsü aser pei inyaknütsü inyaka alitsüba yimsü ka masü saka peisasa azüoka alitsü aser timtem lendong aser sensak tia ajak tizükteta alitsüba yimsü ka lir. Atangji, ibai tangar tenzükba aser tangar dang temeim sayuba yimsü, anungji ajak den putepa litettsüba yimsü ka lir. Ibayongji, alima aika nung Khristan-temi kaketreju tajung lapokja nisungtem nüchi kümdaktsür aser mozü ki tajung aika lapokja nübortem nem taneptsü agütsür. Iba ama Khristantemi inyakba mapatem nungi tajangzük agia lenir tajung akümba Hindu aser Muslim nunger aika lir. Aji oda, tanü Hindu aser Muslim nungertem education tajung ngur yimsüsüba aser ketdangsüba jenjang tajung nung amenertemji Christian school, College aser Univeristy nungi züngtettertem lir. Iba kasaji alima tesem balala nung Khristantemi lapokba mozü kidang jenjang dalang agi taneptsü angur aser ano tesem balala nung Khristantemi temeim mapa inyakba ajanga sensaker aser makamaitertem aika anisüngzük ngudagi. Aji oda, Khristan yimsü yabo tanüla tekümtet agütsüba yimsü ka dang masü saka shi temang nüngdaka dena ngua nüchi kümdaktsüba yimsü lir. Ibayongji, Khristantemi süng long aser ita anü dak mamanger saka süng, long, aser ita anü yanglusang Teyanglur Tsüngrem dak dang amanger. Ajisüaka, tanü alima nung Khristan purtem mereprangner aser Khristan yimsü anemer telok aika adokogo. Aji oda, alima tesem aika nung Muslim nungertemi Khristantem anema apusoba asenoki angur. Iba kasaji India nung Hindu nunger telok aikati Khristan purtem anema inyakba mapatem anogo shia tesem ka nung mesüra ka nungbo atalokdagi. Joko, India nungbo yimteni Hindu nunger shinga Khristan akümtsü memelar aser Hindu nunger temulung meyipa Khristan akümertem dena tanaben Hindu yimsü agizüka amangtsü ajungshiteper. Iba ama mapang ka nung Hindu yimsü keta asenba telok BJP teloki Center nung dang masü saka state ajak nung yimten tashi agia aotsü merangba mapang lir. Aji oda, state nung BJP government nung aküm nung dang Nagaland nunga terenlok mapa inyaktsütsü ta BJP lenirtemi jembiba angashir. Ibaji “nai apudaker ni külemra, item sentsüwangshi alima yimli (government) ajakji nü nem agütsütsü,” ta Satani Yisu dang ashiba mesüka lir. Atangji, center nung yimsüsüba teloki ashi angaba nung alima yimten tashi aser senotsü teyari melamelaa angutsüa akok, saka Jim Reeves-i atenba ama, tang ya asenok asoshi “Hon dang nungibo Yisu-ang shimdi aser yimli ka madak chuba asütsü agibo Yisu-ang shimdi,” ta atentsüba mapang lir ta bilemer. Ano, külen iba dang nungi tuluba lendong kaji asen lima ya asenoki meteta aser memeteti Muslim nungertemi atsüngbangdagi. Joko, parnok maden asenoki kecha meinyaktet kümogo. Iba amai lia lia 2070 küm tashi nungbo Nagaland for Christ lima ya Hindu mesüra Muslim lima-ang ka akümtsü mesüka lir. Talisa tang asenoki ngua Europe nung France aser UK ama tashitait lima nung Muslim nungertemi yimten tashi agiadoker lisopurtem mulung animesüngzükteti alitsüsa kiralongrartemi amokmerenba angur. Item tashitemetettertem limatem nungji küm ishika jakdang mapa inyaktsü asoshi Muslim nungertem jaoka lidaktsüba purtem tanübo senso kümer, Europe lima ajunga Muslim lima akümtsü merangba tensa mapang ka nung European nunger liso purtem timtemdagi. Asen jakdang asenoki ataloka anguba lendong timtem mapatem nungji tan ser asenoki tangar bendangertem dak metaloka malitsüla aser rongsen aser alima yimli arishia asenoki Yisu toktsür maotsüla. Aji oda, Khristan-ji Khristan ama asenok tamang nung akangakanga nokdakra, alima nung senmang küma agitsüba rongsen aser yimlijibo iba tamangba nung jagi dang angutsü.