Tamangba yimsü anema inyakertem dang taochi mesayutsüla : MHA

Delhi, October 5 (Agencies) : Dadri nung Muslim nunger ka nashishi achiba atema aija tepsetba sülen Ministry of Home Affairs-i Hombarnü state sorkartem dang linük nung tamangba yimsü anema mapa inyakertem dang taochi mesayutsü tetuyuba ka agütsüogo.
Tawa Dadri nung atalokba densema linük tesem balala nung telok balala tsüngda mangatettep adokba atema MHA-i süoki ia bilemer ka tanü MHS-isa metetdaktsü.
Ministry of Home Affairs-isa state sorkartem dang tamangba yimsü anema inyakertem dang taochi mesayutsü tetuyuba agütsüba den kasa mapang nung sorkari terenlok atema alizüng yur mapa inyakba nung teraksa bener arutsü indang tebilemba yur inyaksangshir dang tai matoktsü ta Union Minister MA Naqvi-i ashi.
Ano külen, PMO nung MoS, Jitendra Singh-ia ashiba agi, sorkari tangar memenepertem tashi itdaktsütsü atema tenangzükba agia inyaker.
Dadri nung nisung tepsetba atema yimten telok balala tsüngda ashishitep ken o adoka aitsütepba mapang ka nung District Magistrate-i Hombarnü ashiba agi, BJP MLA Sangeet Som-i o jembiba video footage reprangdangtsü atema ozüng nung mongin nisungtem nem agütsüogo.
Dadri nung Muslim nunger ka tepsetbaji BJP-i tasa atonga inyakba lir, ta UP minister Azam Khan-i aitsür.
Azam Khan-isa RSS anema o jembi aser pai ashiba agi RSS-i tamangba yimsü nung ajemdaker telok balala tsüngda telemsa adokdaktsütsü meranger.
Pai United Nations dangi shidi ka ajanga Dadri nung nisung osangji metetdaktsütsü, ta SP lenirisa metetdaktsü.
Taoba Hombar aonung Bishada yimtsüng nung nisung telok kati arishi küm 50 tain Iqlakh par kidang nungi anizüker zükset. Par kibongi nashi techanu ka tepseta achi ta olulu prokshiba sülen nisung telok jagi pa tepset.