Tamangba yimsü aser kin nung ajemdaker ali atsünga agirtem anema mapa meinyaktsüla: APHLC

Dimapur, February 4, 2022 (TYO): Nagaland aser Karbi Anglong arrtsülen tamangba yimsü aser kin nung dak rangloker ali atsünga agirtem anema mapa inyakba ajanga kin o kin tsüngda tsükchitep adoka azütokshitsü ta All Party Hills Leaders’ Conference (APHLC)-i metetdaktsüogo.

Iba ya APHLC-i Karbi Anglong Autonomous Council (KAAC) indang Chief Executive Member (CEM) dangi züluba shidi nung shia lir.

“Karbi Anglong (KA), West Karbi Anglong (WKA) aser Dima Hasao (DH) nung Indian constitution indang 6th Schedule kübok ketdangsüba tesemtem nungi ali atsünga agirtem meindokba anema onoki menokdaker” ta APHLC-i ashi.

“Ajisüaka Sixth Schedule nung Paragraph 20 kübok shia aliba ama scheduled tribes mesüra tribe nung madenba ali atsünga agirtem dang meindoktsüla” ta parnoki KAAC CEM dang ashi.

“Teinyaktsü tim meinyaki aser parnok jenoktsü maparen kecha melii Karbi Anglong (KA), West Karbi Anglong (WKA) aser Dima Hasao (DH) nungi Naga nunger mesüra hill tribes meindokba magizüker. Lisopurtem nüngdak ali nung dang ali atsünga agirtem meindoktsüla” ta APHLC president J.I. Kathar, IAS (Retd) aser general secretary Sarkiri Rongphar nati shidi nung shia lir.

Supreme Court-i Scheduled tribe pur memeindoktsü tetuyuba agüja lir. 6th Schedule nung Paragraph 20 ajanga KA aser WKA district tem ya lisopur tesemtem aser item tesemtem ya hill tribes mesüra tribe ka indang masü ta schedule nung shia mali ta parnokisa metetdaktsü.

Tamangba yimsü nung ajemdaker ali atsünga agirtem meindokba magizüker kechiyong Sixth Schedule nung STs ya tamanngba yimsü ajak nungi lir ta shia lir, ta APHLC-isa ashi.

Ali atsünga agir teimba kati land pattas ngua lir anungji ali atsünga agirtem merenshitsü melena, ali atsünga agirtemi ozüng alema pattas anguba nung yariteper revenue officers & staff, village headman aser tangartem ang tatishitsü keta merenshitsüla, ta parnoki takhangba agütsü.

Karbi Anglong aser West Karbi Anglong nung non-tribal nisung aikati ali angutsü mechi nung lisopur tetsürtem den kibong akümer. Anungji sensaker lisopur tetsürtem dang nungi tajangzük agiba mapa ya meinyakdaktsütsüla ta APHLC-isa ashi.

Howraghat kübok Uttar Borbil area, Kopili nung Kheroni area, Vothatlangso, Dalimbari, Kolonga, Donka, Jengkha, Parkuppahar, Kothalguri, Kaziranga, Lokhoathoi, Dolamara areas aser Diphu town nung non-ST nunger aikati ali atsünga agia lir. Anungji Sixth Schedule indang Paragraph 20 kübok ali atsünga agiba non-ST nungertem meindoktsüla, ta APHLC-i KAAC CEM nem takhangba agütsüogo.

Sixth Schedule nung Paragraph 2, Sub-Paragraph 7 kübok elections indang inyakyim lateta aliba ama inyak nung dang ali atsünga agiba khuret timi koktettsü ta parnokisa ashi.

Gauhati High Court-i obendang agütsüba KAAC-i tashi angatsüla aser Mini Constitution Sixth Schedule o Election Rules tangsa yanglutsüla ta APHLC-isa takhangba agütsüogo.