Tamangba yimsü aser kiralongraba na bendangtsüla: PM Modi

United Nations, September 26 (Agencies): Ato kilonser Narendra Modi-i, alimai tayongzükba tulutiba ajurua alibaji kiralongrar telok Islamic State ya lir, ta ashiba den külemi, kiralongraba anema raraba hadir tajung ka asütsü atema tamangba yimsü aser kiralongraba na bendangtsü nüngdak, ta ashi.
UN General Assembly mapang Jordan Chuba Abdullah Jordan den jurila senden ka amenba mapang India Ato kilonser Narendra Modi aser Chuba na tsüngda ‘lanurtem kiralongraba telok nung adentsü jangraba nokdangtsü aser alima nung kiralongraba nokdangtsü’ onük nung o lemtep kaogo, ta Hokolbar nü external affairs ministry otongdar Vikas Swarup-iashi.
“Alimai tayongzükba tulutiba ajurua alibaji ISIS ya lir ta lenir anaprong bangjempogo. Tamangba yimsü aser kiralongraba na bendangtsü nüngdak ta Ato kilonseri ashi,” ta Swarup-isa ashi.
Modi-i, alima nung kiralongraba aser ISIS tenteti timtem agütsüba atema lenmangji alima linüktemi telangzüba agütsütsüla, ta ashi.
Alima nung kiralongraba atema convention ka tentettsü atema sentong aliba dak sentakba nung Modi-i, alima linüktemi külem ola ka ser iba tongtibang onük atema jembitsüla aser International convention tentettsüla, ta ashi.
Modi aser Jordan Chuba Abdullah na UN Security Council nung India-a teti atema züngsem ka akümtsü onük-a süoka jembiogo.
“Ato kilonseri, alima nütsüng shilem trok nungi nütsüng shilem ka aliba India ama linük ka Security Council züngsem nung medensembaji magizüktettsüka lir,” ta Chuba Abdullah dang shiogo, ta Swarup-i ashi.
Jordan Chuba-ia, India-i Security Council nung teti atema züngsem kümnübaji pai-a teti pusema arur, ta shiogo.
Chuba Abdullah-i India ji partner tajung ka ama züngshir aser linük ana tsüngda rongsenkettsüng aser security nung amalitep kanür ta shiogo, ta Swarup-isa shisem.

You must be logged in to post a comment Login