Tamangba yimsü nung ajemdaker quota memelatsü: Amit Shah

Dubbaka, Yimpoksüi/Nov. 26 (Agencies): Tamangba yimsü nung ajemdaker quota memelatsü, ta tanü BJP tongti, Amit Shah-i metetdaktsü.
TRS party Tir aser Telangana Chief Minister, K Chandrasekhar Rao-i Ato kilonser, Narendra Modi dang “lokti nung telemsa adokdaktsüsang” ta aija Telangana-i Muslim aser Dalits nunger nem quota agutsütsü akhangba magizükba atema aitsüba sülen ghonda 48 tsüngda Amit Shah-i, NDA sorkari Muslim nunger nem reservations magutsütsü mesüra tangar nema quota magutsütsü, ta metetdaktsü.
Telangana kübok Dubbaka nung lokti senden ka nung jembidang Shah-i, tamangba yimsü nung ajemdaker reservation agutsübaji BJP-i anemer aser party sorkar tashi nung aliba mapang tashibo ibaji memelatsü, ta metetdaktsü.
“Ibaji tamakoktsü, ta metetsümonga TRS sorkari Muslim nunger nem quota shilem 6 agüja aliba nungi 12 kümtsütsü aser STs quota shilem 6 nungi shilem 10 agütsütsü akhanger,” ta paisa metetdaktsü.
“Telangana state assembly-i bangzüng renema iba ozüng yanglushitsü atema Centre matsüngdang benoka liasü. Ajisüaka Supreme Court obendang ajanga quotas shilem 50 tashi agutsüba nokdanger. Onoki reserved categories atema dang quota wazüka yutsütsü,” ta paisa metetdaktsü.