Tamangba yimsü o yimtenren memeyokteptsüla: Deputy CM Patton

Aami/June 07, 2018 nü Deputy CM, Y Patton den BJP lenirtem aser 16-Pfutsero A/C nung NDPP lenirtemi Kami yimdak lenmang tiplen süngdong atemba sülen tangokba noksa nung angur. 

Pfutsero, Aami/June 07 (TYO): Tanü Nagaland Deputy Chief Minister, Y Patton-i tamangba yimsü lenirtem dang, yimtenren den tamangba yimsü meyoktepdaktsüba ajanga Naga nunger makmakshishi mesüdaktsütsüla, ta mepishi.
Phek District kübok Pfutsero jila nung Centre nung BJP-i aniba NDA sorkar küm pezü ajungba benjungmong sentong nung jembidang Patton-i, “BJP o tamangba yimsü na tesendaktep mali, kechiyong iba ya yimtenren party ka dang lir, koba party-i lenla ajak nung tenrenlok agutsütsü aser nüburtem ajungtsü atema inyaker,” ta ashi.
Taküm Tsüklai (February) ita nung state Assembly election mapang aser state nung Lok Sabha bye election mapang nung BJP ji Khristan anemertem, ta ajaba atema tesasaba olen ka nung Deputy CM-i, “Centre nung BJP sorkar küm pezü jungogo, BJP-isa North Eastern states ajunga nung mesüka yimsüsüdar, ajisüaka party-i tesem (NE) nung Khristantem mezüngmeshia inyaker asü?” ta asüngdang.
Naga nunger dang BJP sempaba anentsüla aser tamangba yimsü nung ajemdaker olulu ajanga makmakshishi mesüdaktsütsüla, ta mepishia Patton-i, Nagaland ama rongsen maliba state-i Centre sorkar senotsü nung metaloker alir, anungji ruling party den teti tesendaktep tajung ayutsüla, ta ashi.
Pai ashiba agi, Narendra Modi lenisüba kübok BJP-i aniba NDA-i 2019 Parliamentary elections nunga takok angutsü, anungji Naga nungeria state nung BJP agizüktettsüla.
“Onoki BJP nung denaka onok tamangba yimsü memelenshi aser maneni Khristan lir, aser state aser tesem nung Khristantem anema langa tai inyakra ola tashii adoktsü atema onok BJP nung lir,” ta pai metetdaktsü.
Nüburtemi state nung People’s Democratic Alliance (PDA) nungitba atema pelaba lemsatepa Deputy CM-i, state nung taoba sorkar mapang küm pezü tashi tanen makai timtem adoka liasü, ajisüaka tan PDA sorkaribo terenlok bener arutsütsü atema inyaker, ta ashi.
“Teloktep partners tashi itta lir aser nüburtem ajungtsü atema sorkar tashi itta alitsü asoshi onoki inyaktsü. PDA maneni tashi itta alitsü aser Chief Minister Neiphiu Rio lenisüba nung akanga nokdaktsü,” ta paisa ashi.
Phek district nung Assembly menden pongu lir, ajisüaka BJP pu masem aser NDPP candidate ka, Neiba Kronu-i dang takok angu, ta shia Patton-i, 2019 Lok Sabha election nungbo nüburtemi PDA candidate yaritsü imlar, aser taruba State Assembly elections nunga PDA candidates marendaki yaritsü imlar, ta pai ashi.
Sentong aliba tesemi aoba mapang nung Deputy CM-i Kami yimdak aser Glory Peak Pfutsero nung lenmang tiplen süngdong temja liasü.
Kasa sentong nung Nagaland BJP State Executive Member, Mughato Achumi, State General Secretary, Eduzü Thelüo aser BJP ex-candidate & state executive member Kevechutso Doulo nungeria jembia liasü.
Iba sentong nung BJP züngsemtem dak alia NDPP party lenirtem aser pusemertema aden.
Iba sentong ya BJP Phek district vice president, Vepasayi Resüh leniba nung agi aser Sanyi Krocha-i sarasadema sentong tenzüka liasü.
BJP Phek president Nucutso Ruho-isa lokti pelaa agizükba o jembi, Sakraba Unit BJP 17-Chizami Mandal-i sobaliba ken ka aten aser BJP State Executive Member, Khüpo Kezo-i tepela anküp o jembia liasü.