Tamangba yimsü tenüng amer shingaia ozüng alema inyaktsü makok: Modi

New Delhi, August 27 (Agencies): Dera pusemertemi Haryana aser Panchula nung mepetmesü adokdaktsüba aija Prime Minister Narendra Modi-i Deobarnü ozüng alema inyakertem, shirnok südir süang metoktsütsü, ta metetdaktsü.
“Külen, asen lima nung benjungbentsü mongpu arur aser külen ozüng alema mapa inyakba osang angashir. India ya Lord Buddha, Mahatma Gandhi aser Sardar Patel nunger lima lir. Ozüng alema inyakba kecha magizüktsü. Nisung shingaia tamangba yimsü tenüng amer ozüng alema inyaktsü temeten mali” ta Modi-i tanü Maan ki Baat sentong nung ashi.
Modi-isa Jamiat Ulema-e-Hind nem tenüngsang agüja jembidang, “Gujurat nung taküm tzümetsüng aruba sülen tzü süngjema akümdang, tesempatsü jana onsara liasü. Ajisüaka Jamiat-Ulema-e-Hind-i temple 22 aser mosques 2 merüktettsü” ta Modi-i ashi.
“Parnok külemi longjem aser külemi inyak. Jamiat-Ulema-e-Hind züngsemtemi merükmeju atema longjemba indang tatishitsü tajung sayuogo. Iba tangatetba nung asenoki merükmeju atema inyakra, asen linüki jenjang temaba atongtsü” ta paisa metetdaktsü.
Modi-i National Sports Day tenüng nung sports meimertem dang salem aben aser saisapong balala nung shilem agitsü ayongzük.
Tanü tanurtemi playground nung masü play stations nungang temulung agütsür. Ajisüaka kima nung asayatsüla. Mapang ka kibong nung tanurtem kima nung oa asayatsü aodang, tetsüi nenok kodang kidangi meyipa arutsü ta-sa asüngdang, saka tanübo tetsü kati na kodang kimai aotsü ta asatener. Mapangtem tem kanga melenshiogo, ta Prime minister-isa ashi.
Iba asoshi Sports Ministry-i Sports Talent Search Portal ka tenzüktsü aser iba nung sempettem anitettsü merangtsü, ta paisa shisem.
Saisapongtsü sempet aliba tanur mashi kati iba portal nung biodata mesüra video upload asütsü akok. Ano, Taküm October ita India nung FIFA Under-17 World Cup alitsü, ta Modi-isa metetdaktsü.
Dr. Sarvepalli Radhakrishnan-i tesayur tajung ka ama aliba atema tenüngsang agüja Modi-i taküm tesayurtem anogo nung, asenoki temelenshi, shisatsü aser len anitsü tesayubatem agütsütsü nangzükdi, ta pai ashi.
“Asenoki September 5 nü Teachers Day ama amunger. Iba ya asen taoba tir Dr. Radhakrishnan indang tasoba anogo lir. Pa tir liasü saka pa taküm piyong, pai pa tesayur ka ama dang bilema ali. Anungji taküm Teachers Day nung asenoki temelenshi, shisatsü aser lenirtem adokdaktsütsü atema sayutsü tenangzükba agidi” ta Modi-isa ayongzük.